Formula One Singapore Grand Prix-ah Lewis Hamilton chu pakhatna a ni a, world championship-ah hma a hruai fal ta hle.

Pole position atanga bul tantu British driver Hamilton hian pahinhna dinhmun hauhtu Red Bull driver Max Verstappen chu a tawp thlengin a dang thei a, championship standing-a pahnihna ni mek Ferrari driver Sebastian Vettel chu pathumna a ni.

Tun season chhungin Hamilton hian pole position vawi 7 a chang tawh a, an tlan tirh phat atangin a tlan fuh nghal em em a, lap 61 thlengin tihsual leh harsatna a nei lo a, a hma berah a tlan deuh ngar ngar a.

Pathumna atanga bul tantu Vettel chuan lap hmasa berah Verstappen chu a lehpel nghal a, mahse Ferrari team chuan strategy an kalpui fuh lo hle a, hun lo deuha pit stop an neihtir vangin Force India driver Sergio Perez hnungah a awm phah a. Pit stop-a Hamilton a luh ve chuan Perez hmaah hian a chhuak leh hman a ni.

Intlansiak laihawl velah Hamilton hi Verstappen chuan a hnaih ve deuh hman a, tlan muang zual an um phak leh tan avangin duh angin an tlan vak thei lo a, hei hi Verstappen hian hman tangkai a tum a, a hlawhtling ta lo a. Hei bak hi chu Hamilton tan hian dinhmun hlauhthawnawm han sawi tur a awm lo hle.

Hetianga Verstappen a rawn chet takah chuan Hamilton hian a lo dang ngar ngar a, a tawp thlengin an indang hlawhtling thei a. Hamilton hian intlansiak vawi 6 la awm tur, point 150 la hmuh theihna turah title a ta neih thei tep tawh a ni.

Singapore khaw lailia Marina Bay Circuit-ah hian Mercedes aiin Ferrari hi dinhmun tha zawk tura ngaih a nih laiin Mercedes driver Lewis Hamilton chuan a chungnung zawk an nih theihzia a lantir chiang hle.

Result:

1 Lewis Hamilton, Mercedes

2 Max Verstappen, Red Bull

3 Sebastian Vettel, Ferrari

4 Valtteri Bottas, Mercedes

5 Kimi Räikkönen, Ferrari

6 Daniel Ricciardo, Red Bull

7 Fernando Alonso, McLaren

8 Carlos Sainz, Renault

9 Charles Leclerc, Sauber

10 Nico Hülkenberg, Renault

Drivers’ Championship:

1 Lewis Hamilton, Mercedes 281

2 Sebastian Vettel, FerrariI 241

3 Kimi Räikkönen, Ferrari 174

4 Valtteri Bottas, Mercedes 171

5 Max Verstappen, Red Bull 148

6 Daniel Ricciardo, Red Bull 126

7 Nico Hulkenberg, Renault 53

8 Fernando Alonso, McLaren 50

9 Kevin Magnussen, Haas 49

10 Sergio Perez, Force India 46