Andhra Pradesh sawrkar chuan an lo in tiam tawh angin 2016 Rio Olympics-a silver medal hlawhchhuaktu Indian badminton star PV Sindhu hnenah Deputy Collector hna an pe a, Sindhu hian a hna thar hi a zawm fel tawh.
Sindhu hian Gollapudi khua a awm Chief Commissioner of Land Administration (CCLA)-ah a hna thar hi a zawm a, a hna thar a zawm hma hian Special Chief Secretary Anil Chandra Punetha hnenah a inhriattir (report) hmasa a hemi hnu hian IAS officer M Jagannatham hmuhpuiin hna thar hi a zawm tih a ziakfel.
Kum 22 mi Sindhu hian Andhra Pradesh sawrkar chungah lawmthu a sawirualin a hna hi țha taka thawh a tum tih a sawi a, inkhel zui zel a tum bawk tih a sawi.
July ni 27 khan Andhra Pradesh sawrkar chuan Sindhu hna thar an pek thu hi an tifel a, Chief Minister N Chandrababu Naidu chuan Sindhu hnenah hian appointment letter a hlan thlap nghe nghe. Hna thar an pe tih an puan rual hian thla khat chhung thil tihfelna hun pek a ni a, certificate țangkai turte a thehlut bawk.
Deputy Collector ni tur hian training neih a țul avangin Sindhu pawh hian training a mamawh dawn a, a training zawh hian kum thum chhung a hna a thawh a ngai dawn a kum hnih chhung hi enchhinna hun anga chhiar a ni bawk ang.
Kum hnih chhung hian test hrang hrang hmachhawn tur a awm a, Sindhu hian sawrkar duan anga thil a tih zel chuan Union Public Service Commission (UPSC) hnuaia awm Indian Administrative Service (IAS)-ah a kaisang thei dawn a ni.
Rio Olympics-a silver medal a dawn khan Andhra Pradesh sawrkar hian Group-1 officer hna an pe dawn tih an sawi nghal a, lawmpui nan pawisa fai cheng vaibelchhe thum an pek bakah in hmun zau tak Amravati-ah an pe bawk.
Kumin February thla khan sawrkar tiam angin Sindhu hian hna dilna hi a thehlut a, Andhra Pradesh Assembly chuan ngaihtuah nghalin AP Public Service Commission hnenah an hlan leh a tihfel a ni ta a ni.
SINDHU SULHNU:
* Commonwealth Youth Games 2001 - Gold (Girls' singles)
* Asian Junior Championships 2011 - Bronze (Girls' singles), Bronze (Mixed team)
* Asian Junior Championships 2012 - Gold (Girls' singles)
* World Championships 2013 - Bronze (Women's singles)
* Asian Championships 2014 - Bronze (Women's singles)
* Commonwealth Games 2014 - Bronze (Women's singles)
* Asian Games 2014 - Bronze (Women's singles)
* World Championships 2014 - Bronze (Women's singles)
* Uber Cup 2014 - Bronze (Team)
* Uber Cup 2016 - Bronze (Team)
* South Asian Games 2016 - Silver (Women's singles), Gold (Women's team)
* Rio Olympic Games 2016 - Silver (Women's singles)