Silverstone-a vawi 6 chak thei Hamilton

15th July 2019, 02:07AM

Lewis Hamilton chu Pathiannia Formula One British Grand Prix-ah pakhatna a ni a, Silverstone-ah vawi ruk chak ber a ni ta a, helai intlansiakna hmuna driver hlawhtling ber a la ni.

Mercedes driver Lewis Hamilton hi an intlansiak hma khan an rama intlansiakna hmun Silverstone Circuit-ah Jim Clark leh Alain Prost te nen chak hnem ber an ni a, vawi nga theuh pakhatna an lo ni tawh a. Pathiannia an intlansiaka pakhatna a nih leh takah chuan Hamilton chuan record thar a siam thei ta a ni.

Hamilton chuan pahnihna atangin bul a tan a, a teammate Valtteri Bottas chuan a hma ber atangin bul a tan a. A tir atangin Hamilton hian Bottas chu lehpelh a tum nghal hle a, a thil tum chu a tihlawhtling vat a, mahse a inlehpelhtir leh thung a ni.

Lap 20-ah safety car a chhuak a, hei hi Hamilton chuan a chhawr tangkai ta hle a, pit-ah a lut a, hma a hruai chhoh theih phah a. A tawp thlengin Hamilton chuan hma a hruai tawh a, pakhatna niin point 39 ngawtin hma a hruai fal tawh a ni.

British driver Lewis Hamilton hi tun season chhunga intlansiak 10 awm tawhah vawi 7 chu pakhatna a ni tawh a. Record thar a siam thei bawk a, Silverstone-a mipui pun khawm hnem ber tuma mi 141,000 zet hmaah lawmin a zuang nasa hle.

Northamptonshire khuaa intlansiakna hmunah hian Lewis Hamilton chu Royal Automobile Club cup an pe a, lap hnuhnung berah Hamilton hian fastest lap record a siam nghe nghe a. Intlansiakah hian pole position changtu, Hamilton-a teammate Bottas chu pahnihna niin, Ferrari driver Charles Leclerc chu pathumna a ni bawk.

Silverstone circuit-ah hian boruak eng eng emaw a awm nual a, lap 38-ah Max Verstappen chuan Stowe-ah Sebastian Vettel chu a lehpel a, felfai taka an inlehpelh hnu hian Vettel chuan Verstappen car hnungah a va su a. Car pahnihte hi kawng sirah an chhuak ve ve a, thuneitute chuan Vettel hi 10-second penalty an pek phah a, drivers’ championship standings-ah Vettel hi Hamilton aiin point 101 ngawtin a hniam tawh zawk a ni.

Red Bull driver Pierre Gasly chu palina niin, a teammate Max Verstappen chu pangana a ni a. McLaren driver Carlos Sainz chu parukna niin, Renault driver Daniel Ricciardo chu pasarihna a ni a, a hnungah hian Alfa Romeo driver Kimi Raikkonen chu a awm bawk a ni.

British Grand Prix result

1 Lewis Hamilton (Gbr) Mercedes 1:21:08.452

2 Valtteri Bottas (Fin) Mercedes 1:21:33.380

3 Charles Leclerc (Mon) Ferrari 1:21:38.569

4 Pierre Gasly (Fra) Red Bull 1:21:43.144

5 Max Verstappen (Ned) Red Bull 1:21:47.910

6 Carlos Sainz (Esp) McLaren 1:22:02.091

7 Daniel Ricciardo (Aus) Renault 1:22:02.853

8 Kimi Raikkonen (Fin) Alfa Romeo 1:22:13.992

9 Daniil Kyvat (Rus) Toro Rosso 1:22:15.172

10 Nico Hulkenberg (Ger) Renault) 1:22:21.185

11 Lando Norris (Gbr) McLaren 1:22:22.733

12 Alexander Albon (Tha) Toro Rosso 1:22.24.069

13 Lance Stroll (Can) Racing Point 1:22:29.538

14 George Russell (Gbr) Williams at 1 lap

15 Robert Kubica (Pol) Williams at 1 lap

16 Sebastian Vettel (Ger) Ferrari at 1 lap

17 Serio Perez (Mex) Racing Point at 1 lap

Not classified: Antonio Giovinazzi (Ita) Alfa Romeo (18 laps), Romain Grosjean (Fra) Haas (9 laps), Kevin Magnussen (Den) Haas (6 laps)

Fastest lap: Lewis Hamilton

Driver standings

1. Hamilton, Mercedes - 223
2. Bottas, Mercedes - 184
3. Verstappen, Red Bull - 136
4. Vettel, Ferrari - 123
5. Leclerc, Ferrari - 120
6. Gasly, Red Bull - 55
7. Sainz, McLaren - 38
8. Raikkonen, Alfa Romeo - 25
9. Norris, McLaren - 22
10. Ricciardo, Renault - 22

Copyright © inkhel.com 2024. All rights reserved.