Mipui sang tel ri hut hutin an hmuh chak em em inkhel an tan a, hun tir lam minute 10 vel chu N. Colony FC te’n ball chang tam ve deuh mahse a hnu lamah erawh Meisavaih naupang rual ho show a ni ti ila kan sawi sual tampui awm lo e.
Inkhel tan atanga hun reiloteah Meisavaih lamin chance duhawm tak mai an nei a, goalkeeper awm tawh loh hnuin an pet over luah kha chu an ui vawng vawng khawp ang.
Hun rei pawh a nih hmain Meisavaih lam bawkin chance an nei leh a; mahse, goal ban an pet per leh dawt thin khan an champion loh ni a hril an ti ve ngeiin a rinawm.
Inkhel thawh khatna hun tawp dawn lamah Lunglunga ball pek tha zet chu Tisi Express Chhuarona'n changin, ani hian vengtu nei lo Beilysa pein, Beilysa hian mawi lutuk maiin a kheng lut a, N. Colony mipui thawm a va ring tehreng em!
Meisavaihin chuti maia tlawm an tum loh zia lantirin, Sawma'n ball tha tak a hmuh chu nalh taka goalkeeper pet khum tumin a pet a, “Goalllll” tia au pawh an awm hman nual a. Mahse, N. Colony FC goalkeeper palian leh Best Goalkeeper atana an thlan zui tak K. Tochhua chuan mawi lutuk maiin a nam chhuak hman hram a, chawlhlawk hamrikin a zui nghal a ni.
Inkhel thawhnihnaah ruah a tla sep sep a, khelmual a tinal tawk chiah a. Ruah sur leh khelmual nal karah inkhel tan a ni leh a.
Clear chance nei hmasa zawk chu tu dang ni loin si phur zawk Meisavaih bawk an ni leh a; mahse, Tochhua that zia a lang chho zel a, lehlam pawlin goal thun theihna hun tha an neih ve pawhin ball chu nalh takin a nam chhuak leh hman hram zel a ni.
Inkhel thawh khatna aiin thawh hnihna hi a nung lo zawk a, chu bakah player tawn hriat ngah nei hnem zawk N. Colony FC chuan inkhel an thunun telh telh a, chumi rah chu an tel zui a.
Striker tharum ngah A. Beihro thawhrah sengin final-a a goal hnihna atan Belysa bawk chuan mar em emin goal dang a thun leh a. Final-ah hian nidanga khel khat tak Beilysa chuan N. Colony FC lawmna a siam chiang hle.
Final inkhel hmuhnawm tak a tawp a, ruah sur kara mipui tam tak hmaah N. Colony FC chuan 2-0 in Meisavaih FC chu an hneh a, Siaha tournament ropui leh ngaihhlutah champion an ni thei ta a ni.
N. Colony FC 2-0 Meisavaih FC
(Beilysa 28' 56')
Champion - N. Colony FC
Runners Up - Meisavaih FC
Best Player - C. Beithalo, N. Colony FC
Best Keeper - K. Tochhua, N. Colony FC
Top Scorer - Vt. Malsawmthanga, Meisavaih FC
Fair Play Award - N. Colony FC