Real Kashmir chuan ngaihnep chi an nih lohzia an lantir leh a, Shillong Lajong chu 6-1 ngawtin an sawp a, pathumnaah an awm theih phah.

Srinagar khuaa TRC Turf Ground-ah Real Kashmir leh Shillong Lajong te hi an inkhel a, Real hian Abednego Tetteh goal hnih bakah Mason Robertson, Nagen Tamang, Gnohere Krizo leh Surchandra Singh te goal khat theuh thun hmangin an mikhualte chu 6-1 in an lo hneh a. Mikhual goal neih chhun hi Samuel James Lyngdoh Kynshi goal thun a ni.

David Robertson chuan 1-0 a Aizawl FC an hneh tuma a khelhtirte kha a rawn rem leh a, a hma ang bawkin Danish Farooq chu substitute bench lamah a awmtir a, a hnua luhtir atan a khek khal a ni.

Alison Kharsyntiew chuan Neroca nen North East Derby an khelh a 1-2 a an chak loh tuma a khelhtir pahnihte chu a thlak a, Nabin Rabha leh Lalawmpuia Hnamte te chu chawlhtirin an aiah hian Hardy Nongbri leh Sheen Stevenson Sohktung te chu a luhtir a ni.

First half chu a hmuhnawm map map hle a, goal li ngawt mai a lut hman a. Inkhelh tan atanga minute 25-ah goal hmasa ber a lut a, Gnohere Krizo chuan Lajong defender pathum a bum hnuah Abednedo Tetteh chu ball a pe a, Tetteh hian Neithovilie Chalieu man hman lohin goal ah chuan a lo thun a, Real chu hma a hruaipui a.

Minute 28-ah Shillong Lajong chuan an si phurh an sut ve leh nghal vat a. Bilal Khan ball pet chhuah fuh lo chuan Samuel James Lyngdoh Kynshi chu fuhin Real Kashmir goal-ah chuan a lut hlauh mai a, 1-1 a nih theih phah a ni.

Minute 37-ah goal dang a lut zui leh a, Surchandra Singh ball pet phei chu Mason Robertson chuan Lajong goal-ah chuan a lo thun a, mual neitute chuan a vawi hnihna atan hma an hruai leh theih phah a.

He goal luh atanga minute 6 lawkah goal dang an thun belh leh nghal a, Bazie Armand chuan midfield lam atangin ball a thawhpui a, Tetteh chuan Lajong defender te a pawt darh a, Nagen Tamang chu ball a pe a. Left winger chuan Real goal thumna a lo thun a, half time a thlen meuh chuan Real Kashmir hian 3-1 in hma an hruai hman a ni.

Second half tan hnu lawkah goal a luh chhunzawm leh nghal zat a, minute 50-ah Aibanbha Dohling chuan Shillong Lajong box chhungah Ivorian star lakah foul a nei a, hei vang hian referee Santosh Kumar chuan Real Kashmir chu penalty a hlawhtir a. Penalty hmang hian penalty hlawh chhuaktu Gnohere Krizo chuan Kashmir goal 4-na chu a thun a, 4-1 in hma an hruai thei a ni.

Minute 74-ah Surchandra Singh chuan hnai deuh atangin Kashmir tan goal a thun belh leh a, minute 83-ah Kashmir goal hmasa ber thuntu Ghanian striker Abednedo Tetteh bawk chuan goal dang a thun belh leh a, hun tawpah Real Kashmir hi 6-1 in an chak thei ta a ni.

Shillong Lajong hian match 8 khelhah point 4 chiah an la hmu a, relegation zone-ah an awm mek a, goal difference pawh -12 a ni.