Sheffield United-in Franck Ribery an beisei

14th June 2019, 02:06AM

Sheffield United chuan thawm an nei lian mek a, Bayern Munich atanga chhuak ta Franck Ribery chu lak dan an ngaihtuah mek.

2007 hnua a vawi khatna atan Sheffield United chuan Premier League boruak an hip ve leh dawn a, an manager Chris Wilder chuan French winger hi an club-a khel tura sawm luh tumin hma a la dawn niin an sawi a ni.

Kum 36-a upa Franck Ribery chuan kum 12 zet a lo khelh tawhna, Bundesliga champion Bayern Munich chu a chhuahsan dawn ta a. A awm zel dan tur engmah tih chian a la nei lo a, Australia leh Qatar vela club thenkhat chuan an dawr tan tawh niin an sawi a. Sheffield United pawhin free transfer-in Ribery hi Bramall Lane-a thlem luh an tum ve tan dawn a ni.

Franck Ribery hian tun thla tawpah Bayern Munich-a contract a neih chu a hmang zo tawh dawn a, a contract a tawp rual hian Allianz Arena a chhuahsan tawh dawn a. Khelhna tur a nei dawn rih lo a, chawlh a la tum chiah lo bawk a, club eng emaw zat chuan beiseina sang tak nen an lo thlir nghal a ni.

Thawm awm mek mahse Sheffield United chuan Ribery hi England lama thlem turin an la be rih lo niin an sawi a. French winger hian a hmain European club lian ve pangngai tak nen inzawm a duh thu a lo sawi tawh a, heti a nih chuan Blades tan chuan beisei san a harsa viau dawn a ni.

Ribery hi Boulogne, Ales, Brest, Metz, Galatasaray leh Marseille velah te a khel kual a, 2007 khan Bayern Munich a zawm a, a hun laia player tha berte zinga sawi tel a ni.

Bayern Munich a zawm hnuah German club tan hian inelna hrang hrangah season 12 chhungin game 400 chuang a khel hman a. Ribery hian Bundesliga champion hi trophy 23 ngawt mai a lakpui hman a, 2013 Champions League-ah a champion pui nghe nghe a ni.

2006 FIFA World Cup-ah khan Franck Ribery chuan France chu pahnihna a nihpui a, 2014 khan ram tana inkhelh a chawlhsan a, France tan vawi 81 chu a khel hman a ni.

Copyright © inkhel.com 2024. All rights reserved.