Sheffield lakah Man United an tlawm

28th January 2021, 04:01AM

Premier League inkhelah Manchester United hian Old Trafford-ah tun season-a che chhe ber Sheffield United lo mikhualin, mual neitu lam Manchester United hi 2-1 in an tlawma, Premier League hmahruai theihna hun tha an neih a bawhpelh.

United tan hian an captain Harry Maguire chuan goal a khunga, mikhual lam Sheffield tan hian Kean Bryan leh Oliver Burke-te chuan goal khat ve ve an khung bawka, Sheffield-in point 3 pawimawh tak an hlawhchhuak.

Khelh 20-ah United hian point 40 hlawhchhuak tawhin, pahnihnaah an awma, hmahruaitu Manchester City chu point khatin an pha lova, United hi khelh khatin an khel tam zawk bawk. Sheffield hian khelh 20-ah point 8 chiah la hlawhchhuakin, table mawngphah, 20-naah an awm  a ni.

Manchester United 1-2 Sheffield United

(Maguire 64’) (Bryan 23’, Burke 74’)

Player Ratings:

Man Utd: De Gea 4, Wan-Bissaka 5, Tuanzebe 5, Maguire 6, Telles 5, Matic 6, Pogba 5, Fernandes 6, Greenwood 4, Rashford 6, Martial 4. Subs: Cavani 6, Shaw 6, Van de Beek 6

Sheffield Utd: Ramsdale 6, Baldock 7, Basham 7, Jagielka 8, Ampadu 7, Bryan 8, Lundstram 7, Norwood 7, Fleck 8, McGoldrick 8, Sharp 7. Subs: Bogle 6, Burke 7, Brewster 6

Inkhela goal hmasa ber hi 20mins chuang khelha lut a ni ni a, Sheffield chuan corner hmu in, corner atanga an ball vawrh luh chu Bryan chuan lo tauh lutin, Sheffield hian hma an hruai. United goalkeeper David de Gea chu a tluk avangin VAR lamah foul a nih leh nih loh endik a ni a, foul a nih loh avangin goal hi sut a ni lo.

Darkar chanve khelh a nihin United hian an si phurh an sut teuh hle a, corner atanga United-in an ball vawrh luh chu Sheffield keeper Aaron Ramsdale chuan man zet mahse a thlauh leha, Anthony Martial chuan goal-ah a lo khung zuia, mahse Ramsdale laka foul phar a nih avangin goal hi pawm a ni lo.

First half-ah goal khat chiah a luta, 1-0 in a tawp. First half-ah Sheffield hian bul an tan tha a, inkhel tan tir atanga hlauhawm nghalin, goal pawh a khung ta ngei a ni.

60mins an khel chho a, United lamin corner an hmu. Corner atang ball vawrh luh chu English defender palian Maguire chuan goal-ah lo tauh lutin , United si phurh a suta, a club hlui lakah goal a khung.

United-in an si phurh an sut atanga minute sawm hnuah Sheffield hian goal an khung ve leha, Burke chuan a zawnin chance a neia, a shot hmasa zawk a pet that tawk loh hnuah, a shot pahnihna erawh goal-ah a pet luta, 2-1 in Sheffield hian hnehna an chang ta a ni.

Copyright © inkhel.com 2024. All rights reserved.