Player inhliam pahnih Luke Shaw leh John Stones te chuan thawhlehnia England training an zawm a, harsatna nei loin player pahnih te hian Jena, Germany-ah team training an zawm a ni.

Kum 30 mi Stones hi Iceland nen an inhmachhawn tum khan a inhliam ve deuh a, Man City defender hi half time-ah Ezri Konsa chuan a thlak a nih kha.

City defender dinhmun hi a ngaihtuahawm loh nia report a ni a, a fitness chungchang ngaihtuah niin, Euro-a an game hmasa berah pawh a inlan theih beisei a ni.

Shaw erawh inhliam avanga United tan pawha inkhel tam thei lo kha a ni a, amahin training a zawm ngar ngar a, thawhlehni atang khan team training tha takin a zawm thei ve ta bawk a ni.

Kum 28 mi United left back Shaw hi England defender zingah chuan veilam hmang thiam awmchhun a ni a, a dam tha a nih chuan regular taka a inkhelh a rinawm.

Stones pawh a dam that chuan England rinrawl tur a ni dawn a, Marc Guehi nen an inkawp a rinawm. 

England hi Group C-ah awmin, an match hmasa ber hi Pathianni zan zanlaiah an khel dawn a, Serbia an hmachhawn ang a, June ni 20-ah Denmark an hmachhawn ang a, June ni 25-ah Slovenia an hmachhawn leh ang.