13 Apr 2019 02:16

inkhel

Shanghai-ah Mercedes driver pahnih an ding hma ber dawn

Pathianni hian Formula One Chinese Grand Prix a awm dawn a, Inrinnia qualifying an tlanah Mercedes chu an che tha hle a, a hmasa pahnihah an awm thei dawn a ni.

Formula One intlansiak vawi 1,000-na chu Shanghai khawpuiah a awm dawn a, hetah hian Mercedes driver Valtteri Bottas chu qualifying-ah a tlan tha ber a, intlansiak hunah a hma ber atangin a tlan tan dawn a. A hnung chiahah hian a team-mate Lewis Hamilton chu a awm dawn bawk a ni.

Vatteri Bottas chu qualifying-ah hian minute 1 leh second 31.547 ah a thleng thei a, a aia tlan chak hi an awm ta lo a. A dawt chiaha awm Lewis Hamilton aiin second 0.023 in a chak zawk a. Ferrari driver pahnihte chu an hnungah hian an awm a, Sebastian Vettel chu pathumnaah awmin, a hnung chiahah hian palina dinhmun hauhin Charles Leclerc chu a awm bawk a ni.

Mercedes leh Ferrari te hnungah hian Red Bull driver pahnih an awm ve leh a, Max Verstappen chu panganaah awmin, a team-mate Pierre Gasly chu paruknaah a awm a. Renault driver Daniel Ricciardo chu pasarihnaah a awm a, pariatnaah chuan a team-mate Niko Hulkenberg a awm ve bawk a ni.

Haas driver pahnih chu a hmasa 10 zingah an tel pha ve ve a, Kevin Magnussen chu pakuanaah a awm a, a team-mate Romain Grosjean chu sawmnaah a awm chiah bawk a ni.

Qualifying result
1. Valtteri Bottas (Mercedes)
2. Lewis Hamilton (Mercedes)
3. Sebastian Vettel (Ferrari)
4. Charles Leclerc (Ferrari)
5. Max Verstappen (Red Bull)
6. Pierre Gasly (Red Bull)
7. Daniel Ricciardo (Renault)
8. Niko Hulkenberg (Renault)
9. Kevin Magnussen (Haas)
10. Romain Grosjean (Haas)