Shakhtar Donetsk coach Mircea Lucescu chuan tlawm takin an striker Luiz Adriano hralh an tum lo tih a sawi a, Brazilian striker hi AC Milan leh Roma-in lakluh an duh ve ve.

Adriano hian kumin December ni 31 thleng daih chauh Ukrainian club tan hian contract a nei tawh a, tunkar tir khan Al-Ahli chuan lei an tuma mahse a hnar.

Lucescu chuan, "Tunah hralh kan duh a January thlaah a thlawna chhuahtir kan phal lo. Milan hian an duh anih chuan awlsam takin ka pe dawn lo tih an hriat a ngai a, €8m man a ni ang."

"Player berin chhuah a duhlo anih pawhin thla ruk la awmah hian kan khelh tir lo ngawt thei lo. Club lian kan ni a, Milan hian Luiz Adriano an duh anih chuan sum an sen a ngai ang." tiin Calciomercato.com hnenah a sawi.

Kum 28 mi Adriano hian season liamta Champions League-ah khan goal kua a khung a, Europe-a striker langsar zingah a in hlangkai.

Kum 2007 March thla khan Shakhtar hi Internacional atangin a zawm a, Ukrainian Premier League-ah vawiruk champion puiin Europa League-ah kum 2008-2009 season khan a champion pui. Ukrainian Super Cup pawh vawinga chawipui tawh a, Ukrainian Cup-ah vawili a champion pui tawh bawk a ni.

Kum 2006 FIFA Club World Cup-a Internacional champion puitu hian Brazil national team tan game li a khel tawh a, kum 2014 November thla khan ram tan a game hmasa ber chu friendly match-a Turkey an hmachhawn tumin a khel.