Alica Schmidt chu tun hnaiah mi tam takin khawvela infiammi sexy ber niin an sawi a, Instagram lamah ngaihven a hlawh thar hle.

German athletics star Alica Schmidt hi an ram aiawha feh chhuah thin zingah chuan beiseiawm ber pawl nia an ngaih mek niin, Tokyo Olympics 2020 ah pawh mi hriat hlawh chho tura ngaih a ni.

A thlen chinah Alica Schmidt hi a che tha chho rih hle a, junior level velah pawh hming a chher chho viau a, 2017 ah khan European Athletics Under-20 Championships ah khan Germany chu 4x400 relay ah silver medal a lakpui a ni.

Kum 21-a upa Schmidt hian nikum lawkah pawh khan hlawhtlinna hmel a hmu bawk a, U23 European Championships-ah an tel a, Germany chu 4x400 relay ah bronze medal a lakpui thei a ni.

Track lamah hian duhthusam result chu a la nei thei chiah lo a, chutih rual chuan social media lamah ngaihven a hlawh thar viau thung a. Instagram velah a thlalak a tar chhuak nasa a, hemi hmang hian khawvel hmun hrang hranga mi a hip khawm mek a ni.

Tun dinhmunah Alica Schmidt hian Instagram-ah hian follower 625,000 a nei mek a, a hmelthatna leh a taksa mawina chu heti lamah hian a pho chhuak nasa hle a, a khat tawkin a thlalak a post deuh fo a ni.

Social media velah follower a neih belh zel a, hetianga a thlalak post thin vang hian Australia rama magazine pakhat ‘Busted Coverage’ chuan ‘Sexiest Athlete in the World’ ah an thlang a ni.

Hun kal zel turah German athlete Alica Schmidt hi athletics huangah chuan lar chho zel tura ngaih niin, Jamaican sprinter Usain Bolt pawh sponsor tu Puma chuan an sponsor mek a ni.