Arsenal chu tun season chhungin Premier League club zingah set-piece atanga goal chhuah hnem ber an ni.

Pathianni zanah Arsenal chuan north London derby an khelhah Tottenham Hotspur an hneh lo a, an chak lohna goal hi set-piece atanga Spurs in an thun a ni a. Hun tawp dawn hnaihah an hmelma club chuan he goal pawimawh tak mai hi an thun hlauh a ni.

Premier League season kal mekah Gunners chuan goal 44 zet mai an chhuah tawh a, set-piece atanga an goal chhuah tawh zat hi 20 niin, corner, free-kick leh penalty atanga an goal chhuah hi 45.5% ngawt a ni a, an sang fal hle.

Gunners hi tlar hnung lamah an tal buai thei viau mai a, 1-2 a Tottenham an hneh loh tuma an goal chhuah pahnih pawh hi defender te tih fuh loh vang a ni deuh ber a. Sead Kolasinac leh David Luiz te tihsual vangin goal an chhuah phawt a, a hnuah set-piece atangin Toby Alderweireld chuan Spurs chakna goal a thun leh bawk a ni.

Manchester United chu set-piece atanga goal chhuah hnem ber dawttu niin, tun season chhungin goal 33 an chhuah tawh a, heng zinga goal 13 te chu set-piece atanga an chhuah a ni a, hei hi 39.5% a ni.

Leicester City chu pathumnaah an awm a, tun season chhungin goal 36 an chhuah tawh a, set-piece atanga an goal chhuah zat hi 13 niin, hei hi 36.1% a ni a. An hnuai chiahah hian Watford an awm a, anni hian goal 54 an chhuah tawh a, goal 19 chu set-piece atanga an chhuah niin, hei hi 35.2% a ni.

Kar tawpa 3-0 ngawta Chelsea hnehtu Sheffield United chu set-piece atanga goal chhuah tlem ber an ni ve thung a. Tun season chhungin goal 33 an chhuah tawh a, set-piece atang hian goal 5 chauh an la chhuah a, hei hi 15.2% a ni.

Wolverhampton Wanderers, Burnley, Tottenham Hotspur, Crystal Palace, Southampton leh Bournemouth te chu set-piece atanga goal chhuah tlem zualte an ni bawk.