24 Nov 2019 08:43

inkhel

Serlui Constituency MLA Cup Football Tournament-ah Vairengte VC-I (Red) an champion

Serlui bial Inter Village MLA Cup Football Tournament 2019 final chu 23.11.2019 (Inrinni) ah khan Joint YMA Field, Vairengte ah khelh zawh a ni ta. He hunah hian Pu Lalrinsanga Ralte, Vice Chairman, Rubber & Allied Crops Dev. Board, Serlui bialtu MLA ni bawk chuan khuallian niin a hmanpui.

Pu Lalrinsanga Ralte chuan MLA Cup football tournament neih hun chhunga harsatna leh buaina hrang hrang tawk lova tluang taka a hmawr bawk a ni thei chu lawmawm a tih thu a sawi a. Tluang taka tournament neih a nih theihnana theihtawp chhuahtu Vairengte Zone Football Association te chungah lawmthu a sawi bawk. Serlui bialtu MLA chuan MLA a nih chhung zawng chu Serlui Constituency MLA Cup chu kumtin buatsaih a nih tur thu a sawi bawk.

Bialtu MLA chuan "Serlui bial thalaite hian theihna kan nei a, Aizawl tlanga an tih theih ang chu kan ti thei ve vek a ni. He bial chhung hmasawnna hi ka ngai pawimawh hle a. Kan bialin hmasawnna a neih theihnan chuan theihtawp kan chhuah zel ang," a ti a. "Thalaite chu ruihhlo ah tlan loin taksa hriselna ngai pawimawh tura chahin infiamna hi eizawnnan kan hmang thei a ni tih hria a, tan la sauh sauh tura fuhin, kan taksa kan rilru a tihthianghlim zual sauh sauh a tul a ni," a ti bawk.

Serlui Bial Inter Village MLA Football Cup-ah hian VC 12 atangin Team 15 an tel a. Bilkhawthlir North VC leh Vairengte VC-1 (Red) ten final hi an khel a ni. Final-ah hian Vairengte VC - 1 (Red) te chuan Bilkhawthlir North VC Team te chu 2-0 a hnehin an champion a ni.

Serlui bial Inter Village MLA Cup Football Tournament - ah hian Champion Team Vairengte VC - 1 Team (Red) in cheng nuai khat (Rs.1,00,000/-) dawngin pahnihna Bilkhawhthlir North VC Team hian cheng sing thum (Rs.30,000) an dawng bawk a ni. He hunah hian Veteran Football Match Vairengte VC - I leh Vairengte VC - II ten an khel a. Bialtu MLA Pu Lalrinsanga Ralte chuan cheng 5,000 ve ve a pe bawk a ni.

He Tournament ah hian mimal leh Team lawmman hrang hrang siam a ni a. Chungte chu:

Best Goalkeeper : Lalhmangaihzuala, Vairengte VC - I (Red)

Best Defender : Ngurdinsanga, Vairengte VC - I (Red)

Best Midfielder : Hmingthanmawia, Vairengte VC - I (Red)

Best Forward : K.Zomuansanga, Vairengte VC - I (Red)

Top Scorer : Vanlalnghaka, Vairengte VC - I (Red)

Fair Play Award : Vairengte VC - II (Black Panther)

Runner up : Bilkhawthlir North VC

Champion : Vairengte VC - I (Red)