Inrinni zan Serie A inkhelah Inter Milan an inlana, Inter hian Ezio Scida-ah Crotone tlawhin, 2-0 in an chaka, champion lam an hnaih zel.

Inter tan hian Christian Eriksen leh Achraf Hakimi-te chuan goal khat ve ve an khunga, point 3 pawimawh tak Milan club hian an hlawhchhuak.

Khelh 34-ah Inter hian point 82 hlawhchhuak tawhin, pakhatnaah an awma, pahnihnaa awm AC Milan nen point 14-in an inthlau. Crotone erawh 20-naah awmin khelh 34-ah point 18 bak an la hlawhchhuak lo.

Zanin hian Atalanta chuan Sassuolo an tlawh dawna, Atalanta hi an tlawm a nih chuan khelh li chiah nei tawh Inter hi an champion tawh dawn a ni.

Inter hi tunah hian Atalanta chiahin an la umpha theia, mahse an umphak erawh a rinawm tawh lo. Kum 2010 hnuah a vawi khat Inter hi Serie A-ah an champion leh dawn niin a langa, kum 9 chhung Serie A-a ro lo rel tawh Juventus chu an phet thla dawn niin a lang a ni.

Crotone lakah hian Inter hi an chungnung zawka, 20mins chuang hret khelh a nihin Romelu Lukaku chuan si ban a pet pera, half time hma lawkin Lautaro Martinez chuan si ban a pet per ve leh bawk.

Inter hian second half-ah goal an khung chauha, 70mins khelh a nih hma chiahin Tottenham midfielder hlui Eriksen chuan Inter hi hma a hruaipui. Inter hian an dinhmun sawhngheh nan hun tawp hma deuh chiahin goal dang an khung belha, Real Madrid fullback hlui Hakimi chuan thui tak ball a khalh hnuah goal a khunga, 2-0 in Inter hi an chak ta a ni.

Serie A inkhel dangah Milan club dang AC Milan an inlan ve bawka, San Siro-ah AC Milan hian Benevento lo mikhualin, an mikhual hi si hnih faiin an hneha, pahnihnaah an hlangkai.

AC Milan tan hian Hakan Calhanoglu leh Theo Hernandez te chuan goal an khunga, AC Milan hi pahnihnaah inhlangkai mahse, an tan Inter Milan umphak a theih tawh loh a ni.