Napoli winger Khvicha Kvaratskhelia chu Serie A player of the year atan an thlang.

Kum 22 mi hian Serie A-ah Napoli a champion pui a, game 34 khelin goal 22 a thawkchhuak. An boss Luciano Spalletti pawh Coach of the Year atan an thlang a, khelh hmabak game nga an la neih laiin an champion fel tawh.

Kvaratskhelia hian nikum nipui lai khan Dinamo Batumi chhuahsanin Diego Armando Maradona Stadium a pan a, €10m man vel niin an chhawr tangkai hle. Kum 33 hnua a vawi khat nan Serie A-ah Napoli a champion pui a, an fan-te chuan "Kvaradona" tiin hminglem an pe.

Serie A CEO Luigi De Siervo chuan Italy ram chhunga player hmuhnawm ber tiin a fak a, ani aia chawimawina dawn phu an awm lo tih a sawi bawk. Gerogian winger hian Dinamo Tbilisi atangin professional football a luhchilh a, 2018 Vau thla khan a thlawnin Rustavi a zawm.

Rustavi-a a awm lai hian loan-in Lokomotiv Moscow-ah a khelchhuak a, 2018-19 season khan Russian Cup-ah a champion pui. 2019 Vawkhniahzawn thla khan Russian club Rubin Kazan-in an lalut veleh a, kum thum chenchilhin nikum Vau thla khan a chhuahsan.

Russia leh Ukraine buaina avangin an ram Gerogia-ah a kir a, Kazan-a a contract neihlai suspend-in thla ruk chhung a chenchilh. Hemi hnu hian Italy lamah insuanin Napoli a zawm a, tunlai khawvela winger tha ber pakhat a ni chho ta a ni.