Serie A-ah club liante an chak lo nual, nizan khan Inter Milan chuan 4-1 in Fiorentina an hneh lova, AC Milan pawhin 1-0 in Genoa an hneh lo, inrinni zan khan Juventus chuan 2-1 in Napoli an hneh lo bawk a ni.
Inter chuan an mualah Fiorentina an mikhual a, first half-ah si thum an phur. Josip Ilicic chuan tan atanga minute 4-na lekah Fiorentina penalty atangin hma a hruaipui a. Nikola Kalinic chuan 18th mins leh 23rd mins-ah te goal a khung. 32nd mins-ah Miranda chu hnawhchhuah a ni a, Inter kim lovin an khel tan.
Second half 60th mins-ah Mauro Icardi chuan Inter tan goal khat khung mahse Nikola Kalinic chuan 76th mins-ah hattrick a siam ta a, 4-1 in Fiorentina an chak ta a ni. He hnehna avang hian Fiorentina chu Serie A hmahruaitu an ni a, Inter Milan nen 15 points ve ve an nei a, Fiorentina hi an chungnung ta zawk a ni.
Genoa chuan si khat faiin AC Milan an hneh a, goal awmchhun hi tan atanga minute 10 na leka Blerim Dzemaili khung a ni. Milan hian theih tawpin nawr let tum mahse 43rd mins-ah Alessio Romagnoli hnawhchhuah a ni ta si a, kim lo chuan an che tak tak thei ta lo a ni. Lazio erawhin kim lovin Verona an hneh a.
33rd mins-ah Filip Helander chuan Verona hma hruaipui mahse second half 63rd mins-ah penalty atangin Lucas Biglia chuan Lazio si phurh a rul. 81st mins-ah Mauricio hnawhchhuah a ni a, Lazio hi kim lo ni mahse 86th mins ah Marco Parolo chuan Lazio tan goal a khung leh ta tho a, 2-1 in Lazio an chak ta a ni.
Inrinni zan khan Juventus chuan 2-1 in Napoli an hneh lova. Lorenzo Insigne chuan tan atanga minute 26-naah goal hmahruai a khung a, Higuain chuan khung chhunzawmin, si hnih faiin Napoli chuan hma an hruai. 64th mins-ah Juventus tan Lemina chuan goal khat khung ve leh mahse an chak zo ta chuang lo a ni.
Game 6 khelh a ni tawh a, Fiorentina chu hmahruaitu an ni, Inter chuan dawtin, Torino chu pathumna an ni a. AC Milan chu 10 na an ni a, champion lai Juventus erawh an che chhe hle a, 15-na an ni mek a, hmahruaitu Fiorentina chu point 10 in an thlau mek a ni.