Serie A lamah champion lai Juventus chuan hma hruai mahse an fal hleithei lova, an hnuai chiaha awm pahnih Lazio leh Inter Milan-te chuan an um zel.
Juventus hian Allianz Stadium-ah Brescia an lo mikhuala, Juve hian an mikhual hi si hnih faia lo hnehin point 3 hlu tak an hlawhchhuak.
He inkhelah hian Paulo Dybala chuan first half-ah mual nei tu lam Juve hi hma a hruaipuia, Juan Cuadrado chuan second half-ah Juve goal hnihna khungin, first half-ah Brescia player Florian Aye chu hnawhchhuah a ni.
Juventus 2-0 Brescia
(Dybala 38’, Cuadrado 75’)
Red Card: Aye 37’ (Brescia)
Inkhel pawimawh takah Lazio chuan Stadio Olimpico-ah Inter Milan an lo mikhuala, mual neitu lam Lazio hi 2-1 a chakin, league table-ah Inter an lehpel nghal bawk.
Mikhual lam Inter hian first half-ah hma an hruaia, goal khungtu hi Manchester United captain hlui Ashley Young a ni. Tun season-a goal khung thei em em Ciro Immobile chuan second half tir lamah penalty spot atangin Lazio si phurh a suta, Sergej Milinkovic-Savic chuan goal Lazio chakna goal a khung bawk.
Lazio 2-1 Inter Milan
(Immobile 50’, Milinkovic-Savic 69’) (Young 44’)
Napoli chuan Sardegna Arena-ah Cagliari an tlawha, mikhual lam Napoli hian si khat faia hnehna changin, goal awmchhun khungtu hi Dries Mertens a ni.
Roma chuan Atleti Azzurri d’Italia-ah Atalanta an tlawha, Atalanta hian an mikhual Roma hi 2-1 in an hneh. Atalanta tan Jose Palomino leh Mario Pasalic te chuan goal an khunga, Roma Edin Dzeko chuan goal a khung ve bawk.
Club langsar zinga AC Milan an la inkhel lova, AC Milan hian zanin zanlai dar 1:15-ah Torino chu San Siro-ah an lo mikhual dawn a ni.
Khelh 24 khelh tawhah champion lai Juventus chuan point 57 hlawhchhuak tawhin hma an hruaia, an hnuai chiahah Lazio awmin, anni hian khelh 24-ah point 56 an hlawhchhuak tawha, pathumnaa tla thla Inter Milan chuan khelh 24-ah point 54 an hlawhchhuak ve tawh bawk. Palinaah Atalanta awmin, khelh 24-ah point 45 an hlawhchhuak tawha, pathumnaa awm nen point 9 in an inthlau a ni.