Serie A Footballer of the Year atan Mauro Icardi

04th December 2018, 10:12PM

Inter Milan striker Mauro Icardi chu Serie A Footballer of the Year atan an thlang a, Thawhtan zan khan Milan khawpuiah chawimawina hi an hlan.

Argentina striker Mauro Icardi hi Italian Players’ Association in chawimawina an sem thin dawngtu zingah 2011 a AC Milan striker Zlatan Ibrahimovic hnuah Juventus player ni lo zinga dawng leh thei hmasa ber a ni.

Mauro Icardi hi season liam taah khan Lazio forward Ciro Immobile nen Serie A top scorer an ni dun a, an pahnih hian goal 29 ve ve an thun a. March thlaa Inter Milan leh Sampdoria inkhelh tuma a khen goal chu goal tha berah an thlang bawk.

Juventus chu team tha berah an thlang a, Massimiliano Allegri chu coach tha berah an thlang bawk a. Allegri hi a zawnin kum 4 chhungin league leh Cup title la kawp thei a nih avangin chawimawina hi an hlan a, he chawimawina hi vawi 4 a dawng ta bawk a ni.

Massimiliano Allegri chuan, “Club ropui tak, player tha rual awm khawmna a ni a, hetiang taka player tha ka thawhpui thei hi ka vannei hle a ni,” a ti.

Allegri pawlte chu a zawna Serie A title vawi 8 la thei turin an kal chho mek a, tun season-ah phei chuan vawi 5 ngawt Ballon d’Or lo dawng tawh Cristiano Ronaldo a nei tawh lehnghal a, Europe khawmualpuia ro rel theih an inbeisei hle.

Fiorentina defender, Italian star Alia Guagni chu Serie A Women’s Player of the Year atan an thlang a, AS Roma legend Francesco Totti leh AC Milan leh Juventus star hlui Andrea Pirlo te chu Lifetime Achievement Award an hlan bawk a, Gianluca Rocchi chu Best Referee atan an thlang a ni.

Copyright © inkhel.com 2024. All rights reserved.