Matthijs de Ligt chuan Ajax atangin Juventus a zawm fel ta a, Italian champion hian Dutch defender hi €75 million ($85 million) zetin an lei a, Serie A defender zingah chuan man to ber a ni.
Juventus chuan Nilaithawhtan (July 18) ah Matthijs de Ligt an lak luh thu hi an puang a, Netherlands defender hian Turin khawpuia kum nga chhung awm turin contract a ziak niin an sawi.
Kum 19-a upa De Ligt chu season hman zawh takah khan Ajax captain a ni a, Eredivisie champion te hi UEFA Champions League semi final a thlenpui thei a. Quarter final-ah Juventus nen an inkhel a Ajax chakna goal a thun nghe nghe a ni.
Netherlands center-back hian tlema defender phanchang tawh zawk Giorgio Chiellini leh Leonardo Bonucci te chu a zawm dawn a ni.
De Ligt an leina man hi Juventus chuan kum nga chhunga pek tlak tur a nih thu sawiin, €10.5 million pek belh a ngai dawn niin an sawi tel bawk.
Club lampang hian eng angin nge contract an ziah tih chu an sawi chhuak hran lo a, Matthijs de Ligt hian season khatah €8 million zel a hlawh dawn nia sawi a awm a, bonus neuh neuhte nen chuan season khat chhunga a hlawh hi €12 million vel a tling thei dawn niin an sawi.
Dutch defender an lak luh hma hian Juventus chuan midfielder pahnih - Aaron Ramsey leh Adrien Rabiot te bakah an goalkeeper hlui Gianluigi Buffon te chu an lo la tawh bawk a. Buffon hian season khat chhung chu an club a chhuahsan a, Paris Saint-Germain lamah a khel a, season khat hnuah chuan Turin khawpuiah bawk a kir leh a ni.
Old Lady hian UEFA Champions League title lak theih chu an tum ber a ni a, hei vang hian player lei lamah pawh thahnem an ngai viau a. Cristiano Ronaldo chuan a season hnihna a hmang ve dawn mek a, tun season-ah chuan Europe khawmualpui inelna sang berah hian a tawp thlen theih an tum lehzual dawn a ni.
1996 khan Juventus chuan UEFA Champions League final-ah Ajax an hmachhawn a, hun pangngaiah 1-1 in an inhnehtawk a, penalty shoot-out hmanga chak zawk an zawnnaah Juventus chu 4-2 in an chak a, an club tana a vawi hnih nan European title hi an la a. Hemi hnuah hian Champions League title an la zui thei ta miah lo a, vawi nga chu pahnihna an ni tawh thung.
Leiah leh boruakah pawh tha em em De Ligt chuan season liam taah khan a lu hmangin Champions League goal vawi hnih a thun a, a aia thun tam chu Cristiano Ronaldo (vawi 4) chiah a awm a. Dutch player zingah chuan Juventus zawm thei pangana niin, a hmain Ouasim Bouy, Eljero Elia, Edwin van der Sar leh Edgar Davids te chuan he club hi an lo zawm tawh a ni.