Serie A season thar tan a ni a, kum 8 zet rorel tawh Juventus chuan Parma tlawhin, Juventus hian khual mualah si khat faiin hnehna an chang nghal.
Juventus tana goal khungtu hi an captain veteran defender Giorgio Chiellini a ni a, minute 21-naa a thun niin, a team chu point thum hlu tak a hlawhchhuahpui.
Juventus manager Maurizio Sarri chuan a naute inkhel a vil thei lova, pneumonia a neih avangin enkawl a la ni. Sarri hian an naute hi an game dawt leha Napoli an hmachhawn hunah a la vil theih a rinawm lova, ngaihtuahawm lutuk ni lem lo mahse treatment la mek a nih avangin a taksa a la chak tawk lo.
Juve hian rin ang ngeiin Sarri-a formation hman thiam 4-3-3 an hmanga, Arsenal goalkeeper hlui Szczesny chuan goal vengin, defence-ah De Sciglio, Leonardo Bonucci, Chiellini leh Alex Sandro-te an intlar. Midfield-ah Sami Khedira, Miralem Pjanic leh Blaise Matuidi-te awmin, tlar hmaah Cristiano Ronaldo, Gonzalo Higuain leh Douglas Costa-te dah an ni bawk.
Juventus squad chhah zia kan hmu a, an first XI pawh an that tawh laiin, bench lamah hming langsar tak tak hmuh tur an la awm cheuva, an defender lei thar Matthijs de Ligt bakah Paulo Dybala, Mario Mandzukic-te chu staring XI chang lo langsar zual an ni a, Aaron Ramsey-a hmel hmuh tur a la awm lo bawk.
Juventus-in first half-ah inkhel an thununa, inkhel tan tir lamah Ronaldo a hlauhawm nghal viaua, goal erawh a khung thei lo. A tir lamah hian Parma pawhin chance tha tak nei ve mahse Szczesny an paltlang zo lo. Minute 20 vel khelh a nihin Juve hian corner an hmu a, corner atanga ball vawrh luh chu Parma lamin clear mahse Sandro chuan box pawn chiahah a lo chang, goal-ah shoot-in goal zawn lo deuh mahse Chiellini chuan a lo khawiha, goal-ah lutin Juve hian hma an hruai.
Juve tan Ronaldo a hlauhawm zui zela, Chiellini-a goal khung atanga minute tam a ral hma in Ronaldo hian Juve goal hnihna a khung emaw a ti; Costa pass chu Ronaldo-a’n goal-ah khung zui mahse VAR-a endik a nih hnuah Ronaldo hi a dar tlema a pawn deuh avangin a offside-a, goal-a pawm a ni lo.
Second half-ah pawh Portugal captain Ronaldo a tal na chhunzawm zela, Parma keeper Sepe a rim angreng viaua, Sepe hi a khel tha hle. Inkhel tawp dawn lamah Parma hian freekick an hmu a, an si phurh sutna hun tha tak ni mahse goal-ah an chantir thei lova, 1-0 a inkhel tihtawp niin champion lai Juventus chuan point thum an hlawhchhuak a ni.
