Serie A an khel zo

03rd August 2020, 03:08PM

Serie A season kal lai 2019-20 season chu khelh zawh a ni ta a, Juventus chu point 1 in an champion a, a zawnin season 9 chhung ngawt Serie A-ah ro an rel tawh.

An game hnuhnung berah Juventus hian champion tawh sa chungin Roma chu Allianz Stadium-ah an lo mikhuala, champion Juventus hi 3-1 in an mualah an tlawm.

Juventus hnaih ber tu Inter Milan chuan an game hnuhnung berah hian Atalanta an tlawha, Inter hi si hnih faiin an chaka, point khat chiahin Juventus an pha lo.

Lazio chuan an game hnuhnung berah an lenluhna Napoli an hneh lova, 3-1 a tlawmin, tun season-a Europe khawmual league liana goal khung hnem ber Ciro Immobile chuan Lazio goal neih chhun hi a khunga, tun season-a a goal 36-na niin, a mah hnaih ber tu Robert Lewandowski aiin goal hnihin a khung tam zawka, Serie A top scorer a ni bawk.

Juventus hi point 83 hmu in an champion a, Inter Milan chu pahnihnaah awmin, point 82 an nei. Atalanta chu pathumnaah awmin, anni hian point 78 an hlawhchhuaka, palinaa awm Lazio chuan point 78 tho an neia, mahse Atalanta hi head-to-head a an chungnun zawk avangin an dinhmun a sang zawk.

Panganaah point 70 nei Roma an awma, paruknaa point 66 nei AC Milan awmin, pasarihnaah point 62 hlawhchhuak Napoli an awm bawk.

Season tharah Serie A atang hian Juventus, Inter Milan, Atalanta leh Lazio te chuan UEFA Champions League an khel dawna, Roma, AC Milan leh Napoli te chuan Europa League an khel ang.

Table mawng berah SPAL awmin, anni hian season tluanin point 20 bak an hlawhchhuak lova, an chung chiahah Brescia awmin, anni hian point 25 neiin, 18-naah Lecce an awma, anni hian point 35 neiin, heng club pathumte hi Serie B lamah an tla thla.

Italy-a professional club upa ber Genoa chuan Serie A hmawr bawk zanah Hellas Verona an hneh avangin an him hrama, Lecce erawh Parma lakah 4-3 a an tlawm avangin an tla a, anni hi Serie A atanga vawi 9 an tlakna a ni.

Copyright © inkhel.com 2024. All rights reserved.