Nizan khan Serie A-ah Fiorentina chuan si thum faiin Atalanta an hneh a, Inter Milan-in an khingpui an inhnehtawk pui si a, khelh 7 atangin Fiorentina chuan 18 points an nei a, Inter Milan erawhin 16 points an nei a, Fiorentina chuan Serie A hma an hruai ta zel e.
Fiorentina chuan awlsam takin kim lo Atalanta an hneh a, tan atanga minute 4-na lekah Gabriel Paletta chuan box chhungah Jakub Blaszczykowski a ti tlu, refree chuan Gabriel Paletta chu red card a hmuh nghal a, penalty a ham bawk. He penalty hi Josip Ilicic chuan goal-ah a chantir.
Darkar chanve an khel tling vel chiah tihin Federico Bernardeschi through ball tha zet chu Borja Valero chuan goal-ah a chantir leh a, second half hun tawp dawn 90 mins-ah Nikola Kalinic through ball tha zet chu Joan Verdú chuan goal-ah a chantir ve leh a, 3-0 in Fiorentina chuan hnehna an chang ta a ni.
Sampdoria leh Inter Milan te chu 1-1 in an inhnehtawk a, 51st mins-ah Luis Muriel chuan Sampdoria tan goal khung mahse hun tawp lam minute 15 la awmin Ivan Perisic chuan Inter Milan si phurh a rul a ni. Roma leh Palermo inkhel a hmuhnawm khawp mai, Roma hian first half-ah Miralem Pjanic, Alessandro Florenzi leh Gervinho te hmangin si thum faiin hma an hruai hman a, second half-ah Alberto Gilardino chuan Palermo tan goal hnih an khung, mahse 90 mins-ah Gervinho chuan an chakna tichiang turin goal dang a khung leh a, 4-2 in mikhual Roma an chak ta a ni.
Lazio chuan si hnih faiin Frosinone an hneh a, Balde Diao Keita leh Filip Djordjevic te chuan hun tawp dawn minute 10 chhungin Lazio tan goal an khung a, khelh 7 atangin Lazio hian 15 points an nei a, table-ah pathumna an ni mek. Champion lai Juventus chuan 3-1 in Bologna an hneh a, Bologna hian goal an khung hmasa a, 5th mins-ah mikhual tan Mourier chuan goal khung mahse Morata, Dybala leh Khedira hmangin Juventus hian an chhang let a ni.
AC Milan erawh an mualah 4-0 ngawtin Napoli-in an sawp a, Napoli tan Insigne chuan goal hnih a khung a, Allan chuan goal khat khungin Rodrigo chuan an lamah a ti goal bawk a ni. AC Milan hi table-ah 11 na an ni mek a, champion lai Juventus chu an hnuai chiahah an awm a, Juventus hian point 10 laiin hmahruaitu Fiorentina an phak lo mek a ni.
Serie A results
Carpi 2 - 1 Torino
ChievoVerona 1 - 1 Hellas Verona
Empoli 1 - 0 Sassuolo
Palermo 2 - 4 Roma
Sampdoria 1 - 1 Inter
Udinese 1 - 1 Genoa
Juventus 3 - 1 Bologna
Lazio 2 - 0 Frosinone
AC Milan 0 - 4 SSC Napoli
Fiorentina 3 - 0 Atalanta
pictures credit : EPA & Getty