16 Sep 2020 05:41

inkhel

Serie A 2020-21 season thlir kualna

Serie A season thar chu September 19 atangin an tan ve dawn a, season an tan karah hian match 7 chu an khelh hmel a, a dang game 3 chu kar hnihnaah an khel ang.

2020-21 season-ah chuan Juventus leh Inter Milan te chu league title la thei tura rin kai zual an nih hmel a, a chungnung pali nih inchuhna boruak pawh a sang hle tura ngaih a ni.

League title kawltu Juventus an champion leh a nih chuan a zawnin Serie A title hi vawi 10 an la thei tawh dawn a, Inter Milan chu a dang thei ber tura ngaih an ni a. 2011-12 season atang khan 2019-20 season thlengin an la champion zel a ni.

Juventus chuan Serie A title hi vawi 36 ngawt mai an lo la tawh a, anni aia league title la hnem hi an la awm lo a. Tun season-ah an champion leh a nih chuan vawi 37 an champion thei chiah dawn a, a zawna vawi 10 champion thei record an siam thar ang.

Season liam taah khan Juventus chuan point 83 an hmu thei a, pahnihna dinhmun hauhtu, anmahni hnaih bertu Inter Milan chu point 1 chiahin an hniam a, point 82 an hmu a. Tun season-ah chuan Inter hian khum theih an tum hle dawn a ni.

AC Milan chuan Serie A club chungnung pali zinga tel leh theih an tum viau dawn a, 2019-20 season tawpah khan parukna an ni thei a. Zlatan Ibrahimovic an chelh zui leh thei a, tun season-ah chuan a hma aia sang zawka awm theih an tum ang.

Atalanta chu season hman zawh takah khan pathumna an ni thei a, tun season-ah pawh dinhmun sang tak luah leh theih ngei an tum dawn a. An che tha chho viau a, khelmualah pawh an hlauhawm hle a. Anni bakah hian Lazio, Roma leh Napoli te chu a langsar zual tura ngaih an ni.

Ciro Immobile chu 2019-20 season chhunga goal thun hnem ber a ni a, Serie A huangah chuan striker tha ber pawl a ni chho zel a. Inter Milan chuan Immobile khum thei tur hian Romelu Lukaku vawrh an duh ang a, AC Milan pawhin Zlatan Ibrahimovic an hmatheh leh ngei dawn a. Juventus pawhin Cristiano Ronaldo chu goal khung lama an dah san ber a ni leh ngei ang.

Serie B atangin Benevento, Crotone leh Spezia te chu Serie A lamah an kai chho a. Benevento hi 2019-20 Serie B champion an ni a, point 86 an hmu thei a, Crotone chuan point 68 an hmu a, pahnihna an ni a. Spezia chu pathumna niin, playoff-ah an chak a, an kaisang ve bawk a. Spezia hi Serie A lama an kai vawi khatna niin, Italian league sang bera tel thei team 66-na chiah an ni.