Serie A 2019-20 season hmawr an bawk fel ve ta a, Juventus chu an champion leh a, Inter Milan chu pahnihna niin, champion team nen hian point 1 chiahin an inthlau a ni.
A chungnung pahnih bakah Atalanta leh Lazio te chu season thara UEFA Champions League khel turte an ni a. A mawng lamah a hniam pathum Lecce, Brescia leh SPAL te chu division hniam lamah an tla thla a ni.
Juventus chu season hman zawh taka chak hnem ber an ni a, Serie A title a zawna vawi 9 latute hian a pumpuiin vawi 36 chu league title hi an la tawh a, 2019-20 season chhungin vawi 26 an chak a, anni aia chak hnem an awm lo.
Turin khaw club te hi season tluanin vawi 7 an chak lo a, chak loh tlem lamah pathumna an ni a, vawi 5 chu an khelhpuite nen an inhnehtawk a ni.
Old Lady hi Italy rama league sang bera goal thun hnem lamah pangana an ni a, goal 76 an thun a, goal difference san lamah pawh 4-na an hauh thei a, an goal difference hi 33 a ni.
Champion team Juventus manager Maurizio Sarri chuan manager a nih hnua league title a lak hmasak ber a ni.
Pathumna dinhmun hauhtu Atalanta chuan Serie A club zingah goal an thun hnem ber a, season pumin goal 98 zet an thun tling a, an goal difference pawh a tha ber a, +50 zet a ni.
Season tluanin Inter Milan chu chak lo tlem ber an ni a, vawi 4 chiah an khingpui hneh loh an nei a. Antonio Conte pawlte hi goal chhuah tlem ber an ni bawk a, an lamah goal 36 chiah an chhuah a ni.
Inter Milan hi chak hnem ber dawttu an ni a, season hman zawh takah khan vawi 24 chu an chak thei a ni.
18-naa season hmang zo Lecce kha goal chhuah hnem ber an ni a, an lamah goal 85 ngawt mai an luhtir a. Brescia chu goal chhuah hnem ber dawttu niin, goal 79 an chhuah bawk a, SPAL chuan goal 77 chhuahin pathumna an ni.
SPAL chu chak tlem ber an ni a, season tluan chhuakin vawi 5 chiah an chak ve thei a, goal difference pawh an nei chhe ber a, -50 a ni a. SPAL hi goal thun tlem ber an ni zui a, goal 27 chiah an thun ve thei a ni.
Lazio forward Ciro Immobile chu goal thun hnem ber niin, season tluanin goal 36 a thun thei a. Italian forward hian Gonzalo Higuain record lo siam tawh, season khata league goal thun hnem ber chu a nihrual chiah a ni.
Ciro Immonile hian Capocannoniere chu a vawi thumna atan a dawng chiah a, European Golden Shoe dawngin, he chawimawina hi chu a vawi khat dawnna a ni thung a. Immobile hi goal luh kawnga inhnamhnawih hnem ber niin, goal 36 a thun bakah hian mi goal thun tur vawi 9 a siamsak a ni.
Juventus thiampuipa Cristiano Ronaldo chuan goal 31 a thun a, Inter Milan forward Romelu Lukaku chuan goal 23 a thun bawk a ni.
Atalanta player Alejandro Gomez chu Serie A huanga assist nei hnem ber niin, mi goal thun tur vawi 16 a siamsak a. Lazio player Luis Alberto (15) leh Sassuolo player Domenico Beradi (10) te chu a hnuaiah hian an awm bawk a ni.