Sergio Ramos chu mipa infiammi tha berah an thlang a, Nilaithawhtan khan Seven Stars of Madrid chawimawina an hlan.

Real Madrid captain Sergio Ramos hian Madrid khawpuia infiamna chawisan kawngah nasa taka a inhnamhnawih avang leh hlawhtlinna hmel duhawm tak a hmuh chhoh nual avangin he chawimawina hi an hlan a ni.

Madrid khaw sorkar thuneitu sang Angel Garrido chuan Ramos hnenah chawimawina hi a hlan a, Real Casa de Correos a he chawimawina hlan hun an hmannaah hian Ramos hnenah Seven Stars of Madrid hi a hlan a ni.

Spanish defender Sergio Ramos chuan, “Real Madrid captain ka ni thei hi lawmawm ka ti a, thil chhuan tlak tak a ni tih pawh ka hria. He khaw aiawh hian khawvel pumpui hriatah kan inkhel chho reng a, title te pawh kan la ve teuh tawh a, Madrid khaw mipuite tan hlimna hun kan thlen ve teuh tawh bawk a. Hetiang boruak thlentir theih zel hi kan tum reng a ni,” a ti.

“In zavaia chungah lawmthu ka sawi a. He chawimawinain chawisan a tum ber chu chawi nung zel thei turin theihtawp chhuah chhunzawm zel ka intiam a. Mipa infiammi zinga tha bera min thlang a, Seven Stars of Madrid chawimawina min hlan hial mai hi chu a lawmawm dan sawi fiah thiam a harsa ka ti a ni,” a ti bawk.

A sawi zelnaah, “Seville, Andalusia a chawr chhuak ka ni a, mahse kum 13 kalta khan Madrid khawpui hian lawm takin min lo pawm tawh a, helai hmun hi ka seilenna ber leh eizawnna atana ka hun hmanna ber a ni a, ka in tak tak ang chiahin ka ngai a ni,” a ti.

Seven Stars of the Community of Madrid dawng thei tur hi infiamna lama inhnamhnawih mi 7 te chuan an thlang chhuak a. Nikum May thlaa a zawna UEFA Champions League title vawi 3 lakpuitu Real Madrid captain Sergio Ramos chu he chawimawina dawng tur hian lungrual takin an thlang chhuak a ni.