07 Jun 2015 04:35

Muantea Chinzah

Serene Williams bawk a ropui leh!

Roland Garros hmeichhe final chu khelh zawh a ni ta a, Final hmuhnawm takah Serena Williams in a khingpui Czech 13th seed Lucie Safarova chu hnehin, Grand Slam title 20 a la der ta. He American mihang hian set khat na awlsam taka la in 6-3 in a la mai a, 2nd set ah pawh 4-1(40-15) in hma a hruai hman a, nimahse he Czech Nu hian pawtthla in 7-6(7-2) in a rawn leh thal ta mai a, 3rd Set ah pawh Safarova hian 2-0 in hma a hruai zet naa, a thiam zawk Serena rawn inlar in a leh thal mawi hle a, 6-2 a 3rd Set la in French Open Nomawi vawi 3 a dawn phah ta.

Serena Williams hian French Open-a champion hi Grand Slam zingah chuan a harsat ber niin, 2002 leh 2013 te khan a champion tawh a, kuminah champion lehin a vawi 3 na a ni ta, GS dangah hi chuan vawi 5 vel tal a lo champ ziah tawh a ni. He World No 1 mihang hian kumin hi a hmang tha hle a, Grand Slam Nomawi kumin ah 2 a la ta der mai a, Wimbledon leh US te a la awm a, a dam that chuan champ tura beisei ber te zing ami a la ni zel bawk.

Agassi Nupui Steffi Graf record a hnaih ta hle a, Steffi khan GS Nomawi 22 zet a chawi a, he record pui tak hi Serena hian a hnaih tawh hle.