Serena Williams chuan Wimledon semi final-ah Barbora Strycova chu hnehin, he tournament bikah final vawi 11 a lut ta.
Centre Court-ah Serena Williams leh Barbora Strycova te hi an inkhel a, American star Serena chuan harsa lo takin Czech player Strycova chu 6-1, 6-2 in a hneh a ni.
Barbora Strycova hian grand slam bikah chuan singles semi final a luh hmasak ber tum a ni a, a hmaa ding, kum 37-a upa Serena Williams chu khawvela hmeichhe tennis player ropui berte zinga mi a nih miau avangin a tan chuan chet that a har hle.
Williams hian record thar a hnaih ta hle a, final a luh takah chuan grand slam title 24 la thei dinhmunah a ding a. Wimbledon title hi a la thei a nih chuan Australian tennis star Margaret Court record chelh lai chu a nihrual thei dawn a. He record thar a nihrual theihna turah hian a hmaah Romanian star Simona Halep chiah a ding tawh a ni.
An inkhelh zawhah Serena Williams chuan, “Final luh leh theih chu a nuam khawp mai,” tia sawiin, Wimbledon title vawi 8 la thei dinhmunah a ding chho mek a ni.
Semi final-a chak ta lo Barbora Strycova chu grand slam hmeichhe singles semi final luh hmasak ber tum tawng thei zingah a upa ber a ni a, kum 33-mi a ni.
Kum hnih leh a chanve kaltaah khan Serena Williams chuan Australian Open title lain, grand slam title 23 a la tling chiah a. Hemi hnuah hian pasal neiin fa a nei tawh a, record thar nihrual tumin tunah chuan tan a la leh tawh a ni.
Grand slam title 24-na lak tum hian a bei chho a, mahse nikumah khan Wimbledon leh US Open final-ah te a chak zo ta lo a. A thil tum a hlen chhuah theihna turah daltu pakhat chiah a awm mek a, All England Club final-ah Simona Halep chu a hneh ngei a ngai dawn a ni.
Nikumah khan Serena hian Wimbledon final a lut bawk a, 2016 final-ah pawh a lo hmachhawn tawh Angelique Kerber nen an inkhel a, Serena hi a chak ta lo a. Nikum lamah pawh rin kai lo zawk a chak avangin kuminah pawh hian hetiang boruak hi thleng ve thei a ni ve bawk a ni.
Semi final lehlamah Simona Halep chuan Elina Svitolina chu 6-1, 6-3 in a hneh a, final hi a lo lut tawh a. Serena chuan Halep chungchang sawiin, “Player tha tak mai, tawh khirh deuh mai a ni a, a khel tha thei em em mai lehnghal a. A hma pawhin grass court-ah hian kan lo inkhel ve tawh a, match hautak deuh a ni zel mai a. Final khelh hun hi a nghahhlelhawm tawh khawp mai,” a ti.
STATISTICAL BREAKDOWN
Serena Williams [11] bt Barbora Strycova 6-1 6-2
WINNERS/UNFORCED ERRORS
Williams – 27/10
Strycova – 8/10
ACES/DOUBLE FAULTS
Williams – 4/1
Strycova – 1/1
BREAK POINTS WON
Williams – 4/5
Strycova – 0/3
FIRST SERVE PERCENTAGE
Williams - 60
Strycova - 61
PERCENTAGE OF POINTS WON ON FIRST/SECOND SERVE
Williams – 88/53
Strycova – 52/44
TOTAL POINTS
Williams - 53
Strycova - 31