12 Sep 2018 03:22

inkhel

Serena Williams cartoon in sawi zui a hlawh

Serena Williams chanchin chuan khawvel hmun hrang hrang a chiah mek a, hetih lai hian a chanchin telna tho, tlema danglam deuh a rawn lang thar ve leh a. Australian cartoonist lar pakhatin a lem a ziah chuan sawi a hlawh leh ta hle.

Australia rama chanchinbu pakhat, The Herald Sun cartoonist Mark Knight chuan Serena Williams thinrim lai lem a ziak a, chu chu an chanchinbuah hian an tichhuak a, he cartoon vang hian sawisel a hlawh phah hle.

Mark Knight hian Serena Williams lem hi hmui lian em em mai, hnar lian deuh leh sam kir bumin a ziak a. Tennis court chhungah thinrim deuha a tum lai niin, leiah chuan racket chhia leh naute hnute hnekna hmuamtelel a awm bawk a, a piahah umpire te chu an lang bawk a ni.

He cartoon hi Inrinnia US Open 2018 hmeichhe singles final lantirna ang deuh niin a ngaih theih ber a. Final-ah khan Serena chu vawi thum ngawt mai dan bawhchhiat vanga hrem a ni a, inkhelh laia coaching neih vang te, a racket a tihchhiat vang te leh umpire a hnial vang tein an hrem a ni.

Cartoon hi a darh chak hle a, mi chi hrang hrangin an dawnsawn dan erawh a inang lo viau mai a. Thenkhatin Mark Knight chu a racist an tih viau laiin, mi thenkhat chuan pawi a sawina an hriat loh thu an sawi ve thung a, inhnialna a awm phah nual.

Milem ziaktupa ber Mark Knight chuan, “US Open final en zawhah he cartoon hi ka ziak a, khawvela tennis player tha ber mai thinrim lai chu chiang takin kan hmu a, ka thil hmuh khan milem ziah dan tur min ngaihtuah chhuahtir a ni,” a ti.

“Social media lamah a lo darh nasa hle a, mak tak maiin an lo buaipui luai luai mai a, ka phone chu a chawl hman lo khawp mai a. Kha cartoon-ah khan chi inthliarna lampang a tel miah lo a, a entir ber chu awm dan mawi lo leh thinchhe lutuk kha a ni mai a. A nihna takah chuan social media velah dik lo takin min sawisel chiam hlawm a, a dik ka ti lo a ni,” a ti bawk.

A sawi zelnaah, “Serena lem ka ziah hma ni thum kaltaah khan Nick Kyrgios lem ka ziak a, naupang awm tha duh lo an tih ang deuhin a benga piai chunga an kalpui lai lem a ni a, engmah sawiselna a awm lem lo a. Serena lem ka ziah khan a vun rawng lampang avang a ni lo chiang a, inkhelhnaa a thinchhiat zia leh a nungchang mawi lo lampang lantirna chauh a ni,” a ti.

Herald Sun editor Damon Johnston pawhin Mark Knight lama a tan tlat thu sawiin, “Mark Knight cartoon ziah kha chi inthliarna emaw, mipa leh hmeichhe thliar hranna emaw lampang a ni lo a, mawi lo deuha tennis player ropui deuh a che lai lantirna mai a ni a. Herald Sun chuan Mark hi kan thlawp tlat a ni,” a ti.