Serena Williams £13,000 an chawitir

10th September 2018, 04:09PM

Inrinnia US Open final-a a chet dan mawi lo tak avangin Serena Williams chu pawisa chawi tura tih a ni a, final khelh chhung hian vawi khat aia tam dan a bawhchhia a, a pawisa chawi tur tling khawm hi £13,000 a ni.

Final-ah Serena Williams leh Naomi Osaka te an inkhel a, Serena hi box atangin khelh dan tur an rawn hrilh tiin umpire Carlos Ramos chuan warning a pe a. Serena hi a thin a rim a, Carlos Ramos chu dawt sawiah puhin ngaihdam dil turin a phut bawk a. Heng avang hian £3,000 chawi tura tih a ni phawt a.

Inkhel an chhunzawm zel a, Serena Williams hian a thinrim avangin a racket chu a paih a, a racket hi a chhiat phah nghe nghe a. Hetianga a chet mawi loh avang hian £2,322 chawi tura tih a ni leh bawk a.

Set hnihnaah umpire a ankhum vak mai a, dawheh tih leh rukru ti hialin a ko a. Hetianga a khawsak avang hian game khat an paihsak a, hengah hian £7,739 chawi tura tih a ni bawk a. A pawisa chawi tur tling khawm hi £13,000 a tling chho ta a ni.

He inkhelah hian Japanese tleirawl Naomi Osaka chu 6-2, 6-4 in a chak a, Serena Williams hi pahnihna niin lawmman hi £1.43 million zet chu a dawng tho a ni.

Serena Williams hian Margaret Court record nihrual a tum viau a, mahse a hlawhchham ta rih a. Margaret Court chuan Grand Slam singles title 24 a la tawh a, Serena hian 23 chu a la ve tawh a ni.

Copyright © inkhel.com 2024. All rights reserved.