10 Aug 2019 04:26

inkhel

Serena hneh lotu Osaka chu No. 1 a la ni dawn

Naomi Osaka chuan Rogers Cup-ah Serena Williams a hneh lo a, heti chung hian hmeichhe tennis ranking-ah chuan a la chungnung ber dawn a ni.

Japanese nula Naomi Osaka hian Rogers Cup quarter final-ah Serena Williams a hmachhawn a, he inkhelah hian Serena chu 6-3, 6-4 in a chak a, semi final-ah Marie Bouzkova nen an inkhel ang.

Toronto khawpuia inkhel dangah Karolina Pliskova chuan Canadian tleirawl Bianca Andreescu chu 0-6, 6-2, 4-6 in a hneh lo a, he result hi Osaka tan chuan thil tha tak a tih theih a, World No. 1 a nih chhunzawm zel phah a ni.

Karolina Pliskova hi 2017 chhung khan kar riat chhung ngawt mai World No. 1 a lo ni tawh a, tun tum tournament-ah hian champion se chu World No. 1 hi a ni thei dawn a. A khingpui tleirawl a hneh zawh tak loh avangin a tan chuan chungnung ber nih hi a theih ta lo a ni.

Kumin June thlaah khan Ashleigh Barty chuan Naomi Osaka chu a lehpel a, World No. 1 a ni a. Mahse, Australian star hi tun tumah second round-ah a tla ta daih a, hei vang hian No. 1 nihna chu a humhim zo ta lo.

Nikum US Open final hnua Serena Williams leh Naomi Osaka te inkhelh leh hmasak ber niin, khami tumah khan American star Serena chuan an inkhelh laiin umpire a hnial chiam mai a. Serena chet dan avang hian an hrem a, Naomi tan vanneihna a inher chhuak a, a champion zui a, Grand Slam title a lak hmasak ber a ni.

Vawi 23 zet Grand Slam title lo la tawh Serena chuan tun tournament-ah hian set a la hloh miah lo a. “Ka tum ram hi ka la thleng mai lo a, helaia duhtawk mai hi ka tum lo bawk a. Nakin lawkah ka duh ang tak chuan ka awm theih vat ka ring,” a ti.

Marie Bouzkova chu World No. 91 a ni mek a, quarter final-ah Simona Halep nen an inkhel a. Set khatnaah Bouzkova hian Halep hi 4-6 in a hneh lo a, mahse, Simona Halep chu a inhliam avangin a khelh chhunzawm thei ta lo a, hei vang hian Bouzkova chuan semi final a luh theih phah a ni.