Serchhip khelmualah Mizoram Police FC-in Chawnpui FC an hneh

13th October 2018, 12:10AM

October ni 12, Zirtawpni khan Serchhip Hmar Veng Sport Complex field-ah Mc Dowell's No 1 Soda Mizoram Premier League (MPL) Season 7 Round 7 match vawi hnihna Mizoram Police FC leh kai thar Chawnpui FC inkhelah Mizoram Police FC chuan sihnih Chawnpui FC an hneh.

Mizoram Police FC tan first half-ah Eric Lalsangzuala chuan goal khat a khung a, Second half-ah Malsawmfela chuan goal khat a khung ve bawk. He inkhelah hian Mizoram Police FC keeper F. Lalmuanawma chu Man of the match-ah thlan a ni.

Mizoram Police FC hian an match hnuhnung berah player pariat laiin hremna an tawk a, training lai la chhuak mahse Chanmari FC 1-0 in hneh lo a, Serchhip khelmualah Thenzawl hmun a training lai Malsawmfela la chhuakin Chawnpui FC an hneh nghal. Khelh tawhah point 9 neiin table-ah pangana an ni mek.

Chawnpui FC hian an match hnuhnung berah Aizawl FC 2-2 in an draw a, kai thar ni mahse khelmual chhungah erawh an mikhual lo hle. Serchhip khelmualah hian ruah a sur nasat avangin an khel tha hlei thei lo a, Mizoram Police FC an hneh lo. khelh tawhah point 7 neiin table-ah parukna an hauh mek.

02:30 PM Mizoram Police FC 2-0 Chawnpui FC

(Eric Lalsangzuala 40', Malsawmfela 71')

MoM: F. Lalmuanawma, Mizoram Police FC

Inkhel tan a ni a, team pahnih te ruahsur nasa vangin an che hlei thei lo a, an inawr tawn zak zak hnuah Chawnpui FC chuan goal thunna hun nei hmasa zawkin K. Roluahpuia (K. Mama) chuan box chhung chiah a tang a, a shot tha zet chu Mizoram Police FC keeper Muanawma chuan a dang hman.

Mizoram Police FC pawhin goal thuna hun tha neiin R. Malsawmtluanga (Msa) corner pet Chawnpui FC keeper Malsawma namper V. Laltanpuia (Tri-a) shot chu Malsawma chuan a dang leh hman hram.

Goal lut awmlo in hun chanve an hmang zo dawn emaw tih hnu hun tawp dawn minute 5 ala awmin mual dinglam sir a tang a Lalrinzuala ball vawrh luh tha zet chu box chhunga awm Eric Lalsangzuala chuan goal-ah chantirin an hmahruaina a khung.

Huntawp dawn tepah Chawnpui FC pawhin an siphurh sutna hun tha neiin Box pawn chiah a tang a, David Laltlansanga shot chu a goal dawn nia a lan laiin Police keeper Muanawma chuan a dang hman hram. Goal luh belh lo in Mizoram Police FC chuan 1-0 a hmahruaiin chawlhlawk an hmang zui ta a ni. 

Second half-ah Mizoram Police FC an chungnung zawk a, goal thun belhna hun tha pawh an nei nghal a, Fakzuala chuan goal kham a petper hluah a, Sawmfela pawhin hnai zet atangin goal ban a petper bawk.

Chawnpui FC pawhin counter attack-in an nawr a, Vanrammawia Ngente chuan box chungah ball la lutin a goal ngei dawn nia a lan laiin Police defender Lalhmunmawia chuan a dansak hman. K. Roluahpuia (K. Mama) chuan a hun tha a hloh bawk.

Mizoram Police FC chuan minute 71-ah an hun tha neih hmang tangkaiin Malsawmfela'n ball tha a hmuh chu Chawnpui FC defender Ruatfela a bum hnuah chiang zetin an goal hnihna a khung a, goal luh belh tawh lo in Mizoram Police FC chuan 2-0 a hnehna changin point 3 hlutak an hlawh chhuak ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.