Indian boxer te chu Serbia ramah an che tha hle a, boxer la naupang tak takte chuan gold medal 7 ngawt an la a, a pumpuiah pakhatna an ni.

Subotica, Serbia-a 36th Golden Glove of Vojvodina Youth Tournament neih zawh takah India ram atanga boxer kalte chuan gold medal 7 an la a, a vaiin medal 17 ngawt an la thei a. Gold medal 7 bakah silver medal 6 leh bronze medal 4 lain, a pumpuiah India chu pakhatna an nih theih phah a ni.

Russia chuan medal 11 an la a, gold medal 3, silver medal 2 leh bronze medal 6 lain an aia medal la tlem zawk, mahse gold medal la hnem zawk Kazakhstan an tluk pha lo a, pathumnaah an awm a. Pahnihna dinhmun luahtu Kazakhstan hian gold medal 5 an la a, medal dang pahnih nen a vaiin medal 7 an la a ni.

India tana gold medal latute chu Aman (+91 kg), Akash Kumar (56 kg), S Barun Singh (49 kg), Vijaydeep (69 kg), Nitu (48 kg), Divya Pawar (54 kg) leh Lalita (69 kg) te an ni.

Aman hi a vannei hle a, a telna weight category-ah hian amah leh midang pakhat chiah an awm a, final an lut nghal a. A khingpui awm chhun Hungarian boxer Laszlo Felfoldi chu 5-0 ngawtin a hneh a, gold medal hi a la thei a ni.

S Barun Singh chuan a khingpui Rade Joksimovic chu 4-1 in a hneh a, Akash Kumar chuan Argentine boxer Jeheil Mirco Cuello chu 3-2 in a hneh bawk a. Vijaydeep pawhin 3-2 bawkin Kazakhstan boxer Azat Assanov a hneh bawk.

Hmeichhe lamah Nitu chuan Scottish boxer Billie Denholm chu 5-0 ngawtin a hneh a, Divya Pawar pawhin Serbian boxer Dajana Grumusa chu 5-0 bawkin a hneh a. Lalita chuan Russian boxer Angelina Kabakova chu 4-1 in a lo hneh ve bawk a ni.

Silver medal dawngtute zingah youth world champion ni lai Jyoti Gulia (51 kg) a tel a, Jyoti hian final-ah a khingpui Italian boxer Martina Pianna chu 2-3 in a hneh ta lo a. Manisha (64 kg) pawhin 2-3 bawkin Russian boxer Lanna Maliuganova a hneh lo bawk a. Neha Yadav (+81 kg) chuan final lut tlang nghal mahse, final-a a khingpui Kazakhstan boxer Dina Islambekova lakah 0-5 ngawtin a tlawm thung.

Mipa inelnaah Ankit chuan Scotland boxer Reese Lynch chu 1-4 in a hneh lo a, Akash (64 kg) pawhin 2-3 in Thailand boxer Bannaphon Pannon a hneh lo bawk a. Nitin Kumar (75 kg) chuan Thailand boxer tho Weerapon Jongjoho chu a hneh lo chiah bawk a ni.

Bronze medal latute chu Saskhi (51 kg), Sakshi Gaidhani (81 kg), Bhavesh Kittamani (52 kg) leh Anamika (51 kg) te an ni.