Boxer ropui Mike Tyson chuan kumin September thlaah boxer ropui dang Lennox Lewis nen an inhnek tur thu reporter-te hnenah a sawi.

Tyson hian a hmelma hlui Evander Holyfield chu a vawi thum nan kuminah a hmachhawn dawn emaw tih laiin, an inbiakna a tlawlha, reporter-te hnenah hian Lewis zawk a hmachhawn tur thu hi a sawi.

Tyson hian boxing chawlhsan daih tawh mahse, nikum November thla khan exhibition bout khel turin a rawn kira, Roy Jones Jr nen inhnekin, inhnek zui zel a tum thu Tyson hian a sawi.

Heavyweight boxer hlui pahnih Tyson leh Lewis te hi kum 2002 khan Pyramid Arena, Tennessee-ah an lo inhmachhawn tawha, hemi tum hian Lewis hian round riatnaah Tyson hi a knockout.

Tyson leh Lewis te hi heavyweight boxer awm tawha ropui ber zinga mi an ni ve ve a, kum 54 mi Tyson hi kum 1987 atanga kum 1990 chhung khan undisputed world heavyweight champion a ni a, kum 2005 khan boxing a chawlhsan.

Kum 55 mi Lennox Lewis hi vawi thum world champion lo ni tawh a ni a, heavyweight division lama undisputed world champion ni thei hnuhnung ber niin, kum 2003 khan boxing a lo chawlhsan tawh a ni.