04 Dec 2019 10:52

inkhel

​Semifinal Leg 1-ah Chhinga Veng leh Electric Veng an inhneh tawk

Mizoram Premier League (MPL) Season 8 Semifinal first leg chu December ni 4, Nilaini zan Rajiv Gandhi Stadium, Mualpuiah Chhinga Veng FC leh Electric Veng FC te inkhelah goal lut awmlo in an inhneh tawk. He inkhelah hian Electric Veng FC midfielder Lalengmawia chu Man of the match-ah thlan a ni.

Team pahnih te hi harsa takin Semifinal an inpet kai a, Chhinga Veng hian table pathumna ni chungin an lut a, Electric Veng hian palina ni chungin an lut ve bawk. Team intluk tawk tak a ni a, league round-ah vawi hnih an inhmachhawn tawhin an intawn hmasa zawkah Chhinga Veng hian 2-1 in anhneh a, an intawn vawihnihnaah erawh Electric Veng hian 3-1 in anhneh thung a, an intawn vawi thumnaah an goal lut awmlo in an inhneh tawk.

First half-ah goal hlauhawm hmuh tur a tam lo a, an inawr tawn zak zak hnuah Chhinga Veng chuan goal thunna hun tha nei hmasa zawkin box pawn chiah atanga midfielder Thasiama shot tha zet chu agoal dawn nia alan laiin goal ban a fuh. Electric Veng pawhin goal thunna hun nei ve bawkin forward Lalruatfela leh Ramhlunchhunga chuan a hun tha an hmang tangkai thei lo.

Second half-ah pawh team pahnih te chungnung zawk an awm chuang lo a, Chhinga Veng chuan goal thunna hun tha nei hmasa zawkin defender Lalmawizuala ball vawrh luh chu box pawn chiah atangin forward Malsawmdawnga chuan tha zetin hlap mahse Electric Veng keeper Malsawmdawngliana chuan adan sak.

Electric Veng pawhin goal thunna hun neiin forward Ramhlunchhunga'n Chhinga Veng keeper Dharminder chiah ahmachhawn hnuah Dharminder chuan a dan hman a, box pawn chiah mual dinglam sir atanga bench atanga lut midfielder Jacob Lalrawngbawla shot chu Dharminder chuan a dan sak bawk.

Huntawp dawnah Chhinga Veng chuan hnehna chan theihna hun tha nei zui leh mahse forward Malsawmdawnga chuan a hun tha neih ahmang tangkai thei lo a, goal lut awmlo in khelmual an chhuah san ta a ni. Semifinal second leg Chhinga Veng FC leh Electric Veng FC hian December ni 10, Thawhlehni zan dar 7:00-ah Rajiv Gandhi Stadium, Mualpuiah an khel ang a, Aizawl FC leh Chanmari FC hian December ni 11, Nilaini zan dar 7:30-ah ankhel ang. Final lut a hriat tawh ang.

(adsbygoogle = window.adsbygoogle || []).push({});