03 Dec 2019 11:15

inkhel

​Semifinal Leg 1-ah Aizawl FC an chak

Mizoram Premier League (MPL) Season 8 Semifinal first leg chu December ni 3, Thawhlehni zan Khan Rajiv Gandhi Stadium, Mualpuiah flood light hnuaiah avawikhat nan table pakhatna I League club leh Mizoram Police FC-in All India Police meet ankhelh avanga semifinal lut Chanmari FC te inkhelah Aizawl FC chuan Isak Vanlalruatfela goal khat hmangin Chanmari FC an hneh. He inkhelah hian Aizawl FC defender Juuko Richard Kassaga chu Man of the match-ah thlan a ni.

Semifinal second leg Aizawl FC leh Chanmari FC hian December ni 11, Nilaini zan dar 7:30-ah Rajiv Gandhi Stadium-ah an khel leh ang a, final lut a hriat tawh ang. December ni 4, Nilaini zan dar 7:30-ah Semifinal first leg match hnihna table pathumna Chhinga Veng FC leh palina Electric Veng FC ten an khel ang.

07:30 PM Aizawl FC 1-0 Chanmari FC

(Isak Vanlalruatfela 71')

MoM: Juuko Richard Kassaga, Aizawl FC

Team pahnih te an intluk tawk hle a, first half-ah goal lut a awm lo. Goal hlauhawm erawh vawikhat ve ve an nei thung. An innawr tawn zak zak hnuah Chanmari FC chuan goal thunna hun tha nei hmasa zawkin box pawn chiah atanga defender Lalrinchhana shot chu goal sirah chiah a kal. Aizawl FC pawhin goal thunna hun tha nei ve bawkin midfielder Isak Vanlalruatfela ball pek luh chu state pawn player Alfred Keimah Jaryan chuan goal sirah chiah apet bawk. 

Second half-ah goal khat a lut. Team pahnih te an innawr tawn leh zak zak hnuah Aizawl FC chuan goal thuna hun tha nei hmasa zawkin midfielder Rochharzela chuan a hun tha neih a hmang tangkai thei lo a, Chanmari pawhin hun tha neiin forward Lalnunzama chuan a hun tha a hmang tangkai thei bik lo.

Aizawl FC chuan nawr chhunzawmin minute 71-ah anhun tha neih hmang tangkaiin Defender Lalramhmunmawia ball pek luh tha zet chu Isak Vanlalruatfela chuan goal-ah chantirin an hmahruaina a khung. Chanmari chuan counter attack-in annawr let a, huntawp dawnah an siphurh sutna hun tha forward MS Dawngliana (Dawngtea) chuan nei mahse goal sirah chiah apet a, huntawp thlengin Chanmari chuan an siphurh hi an sut thei ta lo a ni.

(adsbygoogle = window.adsbygoogle || []).push({});