10 May 2019 09:59

inkhel

Semifinal khel tur Anastasia Electric Veng

 Suzuki Gixxer Pro Volleyball League May 9, Ningani zan inkhelah Anastasia Electric Veng chuan 4-1 in Thutak Nunpuitu Team an hneh.

Anastasia Electric Veng hian match ruk khel tawh in point 16 an nei mek a, table-ah pathumna ni mekin semifinal khel turin am dinhmun an sawh nghet zel. TNT hian match ruk khel tawh bawkin point 7 an nei mek a, amawngphah ni chungin semifinal khelh an tan beiseina a awm toh lo.

Anastasia Electric Vengin set li lain hnehna hlu tak an chang a, 13-15, 15-8, 15-11, 15-9, 15-7 in a mawngphah Thutak Nunpuitu Team lakah an chak a, semifinal an lut.

Chawnpui Sports Centre-ah Anastasia-in pherh takin bul an tan a, set hmasa ber an hloh nghal. Set hnihnaah insiam thain a tawp thlengin inkhel an thunun tluan a, league khelh rukah a vawi thum nan an chak.

Electric Veng team tan C Laldensanga'n point 14 hmuin vawi thum a tisual a, a vawi hnih nan RS Traders Player of the Night-a thlan a ni. Player filawr fal an awm lo va, Rajath Shrivarathi chuan point 11 hlawhin point li a paih bawk.

2016 champion Anastasia hian league point 16 thawk chhuakin pathumnaah an awm a, a sang pali zinga tel turin an dinhmun an tichiang. Hmahruaitu Chhinga Veng Spikers leh pahnihnaa awm Durtlang North an tlang tawh bawk a, zirtawpni zanah point 14 nei Hunthar leh point 11 kawl mek Tuichangralin semifinal hmun ruak pakhat an inchuh ve leh a ni.

Tla chiang sa tawh TNT zuiin knockout round lut pha lovin Chanmari West an tla a, point 13 hmuin tawp an khar. Mizo hlanga khel Muanna Veng team-in khelh rukah point sarih hmuin an tlawm vek a, set erawh an la ziah ve thung.

TNT-in tlang turin beiseina an nei tawh lo va, chuti chungin an zahawmna humhim tumin Anastasia lakah nung takin a tirah an khel. Set hmasa berah 5-1 in an sang a, Anastasia-in bei letin 13-13 a ni hman. Mahse, Hosanna Lalawmpuia leh Laldinchhunga'n Muanna Veng team tan an vaw tla zawn.

Densanga leh Rajath chuan kawng dikah Electric Veng team hruai kirin, set hnihnaah inkhel boruak a inthlak. Na taka nawr zui turin TNT-in theihna an tlachham a, Anastasia-in inpumkhat tha taka an khelh atangin player leh team angin an el zo lo tih a lang.

Set hnihna atangin Anastasia-in tlak fual nei lovin hma an hruai tluan a, kawng hrang hrangah TNT an bet. A tawp set li an inkhelh chhung hian TNT-in set thumnaah point 11 an hmuh bakh point 10 an nei tling lo vek a, an player hlui pathum - Densanga, Lalrinzuala Hnamte leh Lalramnunfela ten Electric Veng team tan hmun pawimawh tak an luah theuh a ni.

Rama'n point ruk hmuin point thum a hloh va, Rinzuala'n point nga hlawhin vawi hnih a tisual bawk a, anni pahnih hi lehlam vuak dangtu ber leh short ball vawtu niin team tan an tangkai.

State dang atanga an lak luh pahnih zingah Sunil S chuan a tir atangin Anastasia tan a khel a, team an inrem fuh tawk lo. Set hnihna atangin Rajath chuan thlakin a khel tluan a, vawi ruk an khelh thlengin Anastasia-in khelmuala lut player paruk nghet tha tak an la la nei hlei thei lo.

TNT-in an player tha an hum zo lo va, player naupang zawk chhawrin chona sang an hmachhawn a, team tichak tura state dang atanga player la lut lo awm chhun an ni bawk. An elpui team dang lakah an hriam zo lo vek a, chutih rualin hmasawn zel thei tura beiseiawm tak ni chungin championship an khar.

Anastasia hmaah Sadraka'n point sarih hlawhin point hnih a hloh va, an khelh apianga che tha mar ber leh tun league-a hmasawn tan Laldinchhunga'n vawi riat vaw tlain tum li a tisual.

Vanlalchhantluanga Sailo (hmuh 8, hloh 7) leh Hosanna Lalawmpuia (hmuh 5, hloh 1) bakah Lallungmuana te rinrawlah an hmang bawk. An player zingah point 10 chuang hlawha hun harsaa rin ngam leh danglamna siam tham an kawl lo va, team thlen chin a sang thei lo a ni.

TABLE 

1. Chhinga Veng Spikers - play 5, point 18

2. Durtlang North - play 5, point 16

3. Anastasia Electric Veng - play 6, point 16

4. Hunthar Veng - play 5, point 14

5. Chanmari West - play 6, point 13

6. Tuichangral - play 5, point 11

7. Thutak Nunpuitu Team - play 6, point 7

Senior May 10, Zirtawpni zan dar 8:00 Fixtures

Hunthar vs Tuichangral

ROUND 3 - Hmeichhia

May 10, Zirtawpni zan dar 6:00 Fixtures

Bethlehem Vengthlang vs Bungkawn

Round 6 Under 18

May 10, Zirtawpni zan dar 4:00 Fixtures

Hunthar vs Tuichangral

(adsbygoogle = window.adsbygoogle || []).push({});