MC Mary Kom chu World Boxing Championships neih mekah semi final-ah a chak lo a, bronze medal a dawng.

World Boxing Championships 51 kg category semi final-ah hian 3rd seed Mary Kom leh Turkish boxer 2nd seed Busenaz Cakiroglu te chu an inhnek a. He inhnekah hian European Championship champion leh European Games gold medallist Cakiroglu chu 4-1 in a chak a ni.

An inhnek result an puan hian India team chuan result chu an pawm loh thu sawiin, International Boxing Association (AIBA) technical committee hnenah an lungawi lohna hi an thlen a. Amaherawhchu, AIBA hian India vuivaina chu thu tlingah an lo pawmsak ta lo thung.

An inhnekah hian boxer pahnihte chuan che hmasa zawk nih an hreh emaw tih theih turin bul an tan a. First round-ah hian Mary Kom chu counter-attack velah a che tha zawk mah niin a lang a, a sang zawk Cakiroglu chuan a sang zawk a nihna chu duh angin a hmang tangkai tam lo hle.

Second round an khel leh a, a hma ang deuh bawkin tactic pawh an thlak danglam vak lo a, hetih rual hian Cakiroglu chu a che fuh zawk mah mah a. Third round-ah chuan boxer pahnihte hian chak zawk nih ngei tumin beihpui an thlak a, a tawpah erawh Cakiroglu chu a chungnung ta zawk a ni.

Chak zo ta lo mah se kum 36-a upa Mary Kom chuan bronze medal a la ta tho a, 51kg category bikah World Championship medal a lak hmasak ber a ni zui a. World title 6 a lak tawh bakah 2012 kumah Olympic bronze medal a la tawh a, Asian title 5 la tawhin, Asian Games leh Commonwealth Games gold medal a lo la tawh bawk a ni.