July ni 12, 2022 (Thawhlehni) atang khan LBS Suzuki All Mizoram Inter Village Football Tournament quarter final khelh tan a ni a, Lengpui VC leh Champhai Kanan VC te chuan an khingpui hneh ve vein semi final an lut a, semi final-ah hian team hnihte hi an inhmachhawn ang.
Match hmasa zawkah Lengpui chuan 2-1 in Hnahthial Jt. VC an hneh a, hun pangngaiah 1-1 in an inhnehtawk a, extra time khelh niin hetah hian Lengpui VC chuan goal an khung leh a, an chak ta a ni.
Goal hmasa ber hi minute 54-a lut a ni a, hand ball avangin Hnahthial lamin penalty an hlawhchhuak, he penalty hi Joseph Vanlalhruaia chuan goal-ah a chantir. Hun tawp dawn tak takah Lengpui chuan handball hmangin penalty an hlawhchhuak ve leh a, F. Lalremsanga chuan goal-ah chantirin 1-1 a ni a, hun a tawp chhunzawm.
Extra time khelh a ni a, minute 97-ah Joe Zoherliana chuan mual veilam sir atangin free kick a pet, Hnahthial goalkeeper Alex-a a chesual hlauh mai, goal-ah a lut zawt a, Hnahthial lamin an siphurh rulh tumin bei ngial mah se an chhang let thei ta lo, 2-1 in Lengpui VC te chuan hnehna an chang ta a ni.
Inkhel hmuhnawm tak a ni a, Hnahthial lam bul an tan tha a, an game pawh a mawi, hetih lai hian Lengpui lamin counter attack hmangin an nawr thin a, an hlauhawm thin hle nghe nghe. Extra time hun tawp dawn tak takah Dindina chuan goal ruakah a tauh goal lo, Hnahthial lamin an siphurh rulhna chance tha lutuk a bawhpelh, inkhel hmuhnawm tak a ni a, team hnihte hi a khawi zawk zawk pawh chak mah se an phu ve ve kan ti thei awm e.
Inkhel hnuhnung zawkah Champhai Kanan VC chuan Republic Veng LC an hneh a, hun pangngaiah 2-2 in an inhnehtawk, extra time-ah goal dang a lut lo a, penalty shootout hmanga chak zawk zawn a ni a, hetah hian Champhai Kanan chuan 4-3 in hnehna an chang ta a ni.
Inkhel an tan chiah, minute 10 chhungin R. Ramdinthara chuan Champhai Kanan tan goal hnih a khung nghal zawt mai. Goal hmasa zawk hi minute 5-a lut a ni a, a penalty hlawhchhuah chu Tharpuia hian goal-ah a chantir, minute 10-ah Mk-a shot goalkeeper save per chu Tharpuia hian awlsam takin a pet goal chhunzawm bawk.
Zara leh a hote an insiamtha a, an game pawh a rawn dik chho zel, first half tawp dawn minute 42-ah Hriata corner pet tha zet chu near post atangin F. Lallawmkima chuan a tauh goal a, half time a nih chuan 2-1 in Champhai Kanan-in hma an hruai.
Second half-ah Republic Veng lam an khel tha tual tual, minute 71-ah box pawn atangin Aron Vanlalrinchhana chuan kawh zetin a shot, defender ten an lo dang kawi a, top corner-ah mawi takin a thlawk lut, 2-2 a ni a, extra time khelh a ngai ta.
Extra time-ah pawh an la inhnehtawk zel a, penalty shootout hmanga chinfel a ngai ta a. Penalty-ah hian a pet hmasa pahnihte ve vein an pet goal lo, goalkeeper pahnihte an che tha hle. Penalty an pet zawh meuh chuan 4-3 in Champhai Kanan an chak ta a ni.