Manchester City chuan FIFA Club World Cup-a an game hmasa berah Club Leon leh Urawa Reds inkhela chak zawk zawk an hmachhawn dawn.
Pep Guardiola leh a naute hian Champions League nomawi an chawi avangin Club World Cup an khel dawn a, semi-final atangin an khel tan ang. Mexican club Leon hi CONCACAF champions anni a, Urawa hi Asian Champions League-a champion lai anni ve bawk.
Kumin intihsiakna hi Jeddah, Saudi Arabia-in an thleng dawn a, team pasarih telna tur niin, Pawltlak thla ni 12 leh ni 22 inkarah an khel ang. Thawhlehni khan an intum dan tur tihfel a ni a, tute nge tel dawn tih erawh chiang takin ala sawi theihloh.
Confederation hrang hrang paruka champion-te'n intihsiakna hi an khel thei a, a thlengtu ram telna league champion an tel thei bawk. Hetiang anih avang hian CAF Champions League-a champion Al Ahly, OFC Champions League winners Auckland City leh Saudi Pro League-a champion lai Al-Ittihad te an tel thei dawn a, South America aiawh tur erawh chinfel ala nilo.
Boca Juniors, Palmeiras, Fluminense leh Internacional-te'n Copa Libertadores khelh mekah semi-final an lut tawh a, Sahmulphah thla ni liah final an khel ang. Copa Libertadores-a champion hian Club World Cup an khel dawn a, team pali chiah an dam tawh avangin an zo fel lek lek tawh.
City hian semi-final an paltlang anih chuan Copa Libertadores champion emaw, Al Ahly emaw, Al-Ittihad emaw, Auckland City emaw an tum dawn a, team tha ve tak tak anih avangin chak chiangsa anga ngaih ngawt ngawt anni bik lo. Kumin hi Club World Cup-in kum 20 a tlinna champha a ni a, an kalphung pangngai an hmanna hnuhnung ber tur a ni bawk.
2025 atang chuan team 32 an tel tawh dawn a, kum hnih dana neih a ni tawh bawk ang. Premier League club zingah Manchester United, Liverpool leh Chelsea-te chiahin Club World Cup hi an la a, champion lai chu Real Madrid niin, kumin kum tir khan final-ah Al-Hilal an hneh. Club World Cup hi tunhnaiah Japan, United Arab Emirates leh Qatar-te pawhin an thleng a, FIFA hian Asia leh Middle East lam an duhsak hle.
FIFA hian 2018 khan tel theihzat tihpun an rawt a, 2021 atang khan kalpui tum ni mahse hri leng vangin an ti thei lo. Team 32 telna tur Club World Cup hi Confederations Cup ang khan an kalpui dawn a, World Cup hmaa kum khat ala awm tihah an khel ang. Hmeichhe tan pawh Futsal World Cup leh Club World Cup siam an rilruk a, an tan hun tur an la puang chiang lo a ni.