26 Nov 2019 06:39

inkhel

Second 30 chhungin Brock Lesnar ka hneh thei ang: Tyson Fury

Tyson Fury chuan Brock Lesnar a cho thu sawiin, WWE huangah emaw, insual pangngaiah emaw second 30 chhungin a hneh theih tur thu a sawi.

Gypsy King chuan American star Brock Lesnar, 42 chu hmachhawn theih ngei a duh thu sawiin, hemi hnuah hian UFC lama luh a duh thu a sawi a ni.

Kum thar February thlaah khian Tyson Fury chuan a vawi hnihna atan Deontay Wilder, 34 chu a hmachhawn leh hmel a. An inhnek hmasak zawkah sawi hlawh deuhin an inhnehtawk tawh a, an inhnek leh a nih chuan chak zawk an awm tawh ngei a rinawm hle.

Kum 31-a upa Fury chuan Deontay ‘Bronze Bomber’ Wilder tan chak chu thil beiseiawm lo tak a nih thu sawiin, an inhnek leh a nih pawhin amah chu a chak dawn chiang tih a sawi chhuak.

UFC heavyweight champion hlui Brock Lesnar chu hmachhawn theih ngei a duh thu sawiin, WWE ring chhungah emaw, insual pangngaiah emaw second 30 chhung lekin Fury chuan chak theih a inbeisei thu a sawi a ni.

Fury chuan, “Brock Lesnar nen hian inbeih ka chak khawp mai a. A fight hi ka en ve nual tawh a, hmachhawn hautak deuh tur a ni tih chu ka hre nghal mai a. Chutih rualin kei chuan ka hneh theih ngei hi ka ring tlat a ni,” a ti.

“WWE huangah a ni emaw, insual pangngaiah a ni emaw, Brock Lesnar hi second 30 chhung chuan ka hneh hman ngei ka ring a. Ka hmaah hian rei tak a ding thei hauh lo ang,” a ti bawk.

WWE huanga Braun Strowman a hneh hnuah Tyson Fury chuan UFC heavyweight division lama tel ve theih a duh thu a sawi chhuak zui a. Heavyweight boxer rothap hian featherweight leh lightweight champion hlui Conor McGregor chu training petu atan a duh thu a sawi a ni.