Premier League season an chhunzawm ta lo a nih chuan Premier League hian an contract an bawhzui puitlin loh avangin £762 million vel zet chu an theh chhuah a ngai dawn niin an sawi.

The Athletic in an tar lan danin coronavirus darh mek vanga 2019-20 Premier League season chhunzawm theih loha chawlh mek chu an titawp a nih chuan Premier League in £762 million zet an pek chhuah a ngai dawn a ni.

Ram chhung leh ram pawn lamah Premier League chuan inremna thuthlung eng eng emaw an ziak teuh a. An thuthlung ziahte hi season tluang taka hman zawh chungchang a ni hlawm a, hei vang hian an intiam anga season an hman zawh loh chuan pawisa hi an seng teuh dawn niin a lang.

Tun dinhmunah chuan Premier League hi April 30 atanga chhunzawm leh tura ruahman a ni a. Inkhel an chawlhsan chhung chuan TV lampangte nen a hmaa ruahmanna an lo siam tawh ang kha kalpui theih a ni lo a, broadcaster te chuan pawisa an hloh teuh teuh tihna a ni.

Inkhel tichhuaktu lian berte zinga mi Sky Sports chuan inkhel tih chhuah tur a awm rih loh avangin ni tin pawisa an hloh nasa hle niin an sawi a, fakna vel atanga pawisa tam tham tak an lak luh theih tur chu an chan nasa hle a ni.

Nilaithawhtanah khan London khawpuiah league chhunzawm leh hun tur chungchang an sawiho a, April 30 atanga chhunzawm leh tura ruahmanna an siam hi Premier League club 20 te hnenah pawh an hrilh nghal vek a ni.

Premier League team te chuan tun season chhunga an pawisa hmuh tur chu a vaia hmuh theih an duh a, hei vang hian thuthlung an lo ziah tawh tipuitling thei turin inkhel entu awm lo chung pawha inkhelh an duh a. An khelh tur angte an khelh vek theih chuan an pawisa dawn theih tur angte an dawn phah dawn a ni.

Team tam takte chu hetianga pawisa an hmuh turah hian thui tak an innghat thin a, broadcast revenue an hmuh atang hian an player te hlawh tam zawk pawh an pe ve thei thin a. Broadcast revenue hi an dawng kim thei lo a nih chuan an tan a buaithlak ve thei viau dawn tihna a ni.