26 May 2015 06:05

digimalt

​Season tharah kan champion leh dawn - Mourinho

Nimin khan Chelsea chuan London kawtthlerah hnehna kawng zawh an nei a, hemi tum hian manager Jose Mourinho chuan Chelsea supporter pungkhawmte hnenah nakkuma an champion leh tur thu a sawi.

"Min support-na zawng zawngah kan lawm em em a ni. Season tharah pawh hnehna kawng zawh turin lo inring leh ru aw. In beiseinate chu tih hlawhtlin sak che u kan tum ang," tiin a sawi.

Real Madrid atanga England lamah a kir leh hnu kum hnih naah Mourinho chuan Chelsea title a lakpui leh ta a. Premier League title pali an lak zinga pathumte chu a hova an lak a ni nghe nghe. Mourinho chuan season thar kumin aia a harsat dawn thu Chelsea TV a hrilh a.

"Season tharah chuan kumin aia tha hi kan nih a ngai dawn, kan khingpuiten theih tawp an chhuah vek dawn. Season thar chu a harsa dawn a, inelna harsa hmachhawn ka duh vang hi a nia England-a ka kir leh, ka hlimpui leh dawn khawp mai," tiin a sawi.

Chelsea hi season tluan deuhthawin Premier League hmahruaitu an ni a, an champion chhunzawm ta reng a, season tharah hian Man City, Arsenal leh Man Utd te chuan title chuh ngei tumin hma an la leh dawn. Manchester United chuan nikum nipui khan £150m lai seng mahse Van Gaal chu sum tam zawk a hman theih tur thu United hotu ten an la hrilh ta deuh deuh. Season thar chu kum dang zawng aiin Premier League a HOT dawn tihna a ni mai.