Juventus manager Massimiliano Allegri chuan Ajax hneh lova Champions League atanga an tlak hnuin season tharah Juventus-a a la awm zel tur thu a sawi.

Allegri hi tun kar chho khan season tharah Juventus a enkawl tawh lo maithei tih thu chu chanchinthar lakhawm tute chuan an ti darh chiam a, mahse amah ngeiin engkim a rawn sawi chiang.

Champions League Quarter-final second –leg inkhelah Juventus hian an home-ah Ajax chu 2-1 in an hneh lova, first-leg ah 1-1 in an lo inhnehtawk tawh bawk avangin aggregate-ah Juventus hi 3-2 in an tla.

Allegri chuan, “Kan president nen kan inbe tawh a, season tharah hian Juventus-ah ka la awm zel dawn avangin season thar atan chuan inbuatsaihna pawh kan kalpui mek tawh,” a ti.

Juventus hian Champions League lak ngei tumin tun season tan hma khan a zawna Real Madrid Champions League vawi thum lakpui thei Cristiano Ronaldo chu an lalut a, beiseina pawh nei sangin an che tha chho viau bawk.

Ajax lakah an dingchang zo lova, semi-final pawh Juve hian an thleng zo lo. Allegri chuan Ronaldo chungchang leh Ajax chungchang tlem sawi belhin, “Ronaldo hi tun season-ah kan tan a thawhhlawk em em a, a bikin Champions League lamah a tangkai hle.

“Ajax hi team tha tak an nih avangin ka player-te chungchang sawi tur em em pawh ka nei hran lo. Ajax hian player tha tak tak an kawl nuala, an inkhel pawh a tha in a hmuhnawm hle. Rinkai lo zawka dah ngawt chi an ni lova, a chhan chu Real Madrid lakah goal nga lai an lo khung tawh.

“Kan tlak dan hi a na em em hran lova, mahse Juventus thil tum chu a ngai reng a ni; Engkimah chak hi kan tum a ni a, mahse a changin final kan thlenga, a changin kan thleng lo a ni,” a ti.