Ningani zanlai khan Premier League inkhelah Manchester United chuan Old Trafford-ah Chelsea an lo mikhual a, 4-1 in United hian hnehna changin, top 4-a season an khar dawn a, season tharah Champions League an khel dawn.
United tan hian Casemiro, Anthony Martial, Bruno Fernandes leh Marcus Rashford te chuan goal khat theuh an thun a, Chelsea goal neihchhun hi Portuguese forward Joao Felix-a thun a ni.
Khelh 37 atangin United hian point 72 an hlawhchhuak tawha, pathumnaah chho in, palinaa awm Newcastle nen point hnihin an inthlau. Chelsea erawh 12-naah an awm chhunzawm zel a, khelh 37 atangin point 43 bak an la hlawhchhuak lova, season tharah European competition hrim hrim an khel dawn lo.
Inkhel an tan hnu lawkah Chelsea in chance tha tak an nei nghal a, Lewis Hall chu veilamah through ball pek niin, Hall hian box chhunga ball a lakluh hnuah Mykhaylo Mudryk-a tan a cross a, Mudryk hian chance tha tak nei mah se, ball a pet hman lova, chance tha tak a hlah. Lehlamah goal a lut zui a, United hian mual veilamah free kick hlawhchhuakin, free kick atanga ball vawrh luh chu Casemiro chuan goal ah lo tauh lutin United hma a hruaipui.
Chelsea in chance an nei chhunzawm ve leh a, Kai Havertz chuan box ah ball lalutin, box dinglam atanga a cross chu Conor Gallagher chuan a lo pet hman lo ve leh a, Chelsea in chance tha dang an khawhral. Minute sawmhnih an khelhin, United lamin chance an nei ve leh a, Antony chuan ball khalhin, a chhakah Antony Martial leh Bruno Fernandes te an awm a, Chelsea tlarhnungah Wesley Fofana bak a awm lo thung. Antony hian box chhung atangin Martial ball a pe a, mahse Martial hian a pet hmain Chelsea captain Cesar Azpilicueta chuan ball a tlawhsawn sak hman.
Minute sawmhnih chuang an khelhin, Trevoh Chalobah-a'n a tackle naah United forward Antony a inhliam a, Brazilian player zawn chhuah hial ngaiin, a aiah Marcus Rashford luh tir a ni. Darkar chanve chuang hret an khelhin Chelsea in chance an insiam leh a, veilam atanga Hall-a ball cross chu, Havertz chuan goal a tauh luhna hun tah tak nei mah se a tauh chhe hle a, goal zawnah a tauh thei lo. 45mins an khelhin, Enzo Fernandez chuan United box chhunga tlan lut Gallagher chu tha tak ball a pe a, far post lamah Gallagher hian shoot mah se, goal a zawn lo hret. Half tima hma lawkin United in goal an khung belh a, Jadon Sancho chu box chhung dinglamah ball pek niin, goal hmazawna awm Martial pe in, Martial hian goal ah a lo pet lut a, 2-0 in first half a tawp.
Second half a minute nga an khelhin, Hall chuan Mudryk chu through ball tha tak a pe a, Mudryk hian a cut luh hnuah box pawn vel chiah atangin shoot mah se, United goalkeeper David de Gea chuan a lo nem chhuak thei hram. Lehlamah chance tha kan hmu chhunzawm leh nghal a, box chhung veilam atanga Malacia cross chu Christian Eriksen chuan lo khawih mah se, Kepa Arizzabalaga chuan line atangin a beng chhuak. Darkar khat an khelh tlin hma deuhin Chelsea in corner atang hlawhchhuaka, short corner an lak hnuah Lewis chuan box chhungah ball lalutin a shoot a, De Gea chuan a lo dan sak.
70mins an khel chho a, Chelsea defender Fofana chuan box chhungah Fernandes titlu in United in penalty an hlawhchhuak. Fernandes hian a penalty hlawhchhuah hi goal ah chantirin, si thum faiin United in hma an hruai. Minute nga hnuah United in an goal lina an thun a, Rashford-a shot chu Kepa chuan dang zet mah se, Rashford hian goal ah a khung chhunzawm leh ta tho a, 4-0 a ni. 80mins chuang an khelhin United in goal an thun belh teuh hle a, mahse Garnacho-a shot chu Chalobah-a'n a block sak hnuah cross bar a per.
Hun tawp dawnah Chelsea in goal an khung ve ta hram a, bench atanga lut Felix chuan midfield atangin ball a khalh a, box pawn vel chiah atangin goal ah ball a pet lut. United in Chelsea hi an chhanglet nghal teuh hle a, mahse Garnacho-a shot chu Chelsea shot stopper Kepa chuan a save sak. 4-1 in inkhel a tawp a, United hian nuamsa takin point thum an hlawhchhuak. Chelsea hian Premier League season khar niah Newcastle an tlawh dawn a, United hian Fulham an lo mikhual ve thung dawn a ni.
