Manchester United chuan an first choice goalkeeper David de Gea chu contract thar an zawrh mek a, mahse Spanish shot stopper hi season tharah United first choice keeper a la ni zel dawn em tih a la chiang lo.
Kum 32 mi hian tun season daih bak Old Trafford-ah contract a nei tawh lova, tunah hian kar khatah 375,000 a hlawh mek a, De Gea hi khawvela keeper hlawh hnem ber a ni. United hian De Gea hi contract thar chungchangah an inrempui teuh tawh hle niin chanchinbu mite chuan an tarlang a, mahse De Gea hlawh hi eng emaw zatin a hniam dawn.
Tihsual a nei fo nen United hian season tharah De Gea hi rinrawl bera hman an tum tawh lo niin chanchinbu thenkhat chuan an tarlang a, De Gea hi an rinawl berah an hmang a nih pawhin, a elpui tur United hian dah an tum nia sawi a ni.
De Gea bakah hian United hian back up pahnih an nei mek a, kum 37 mi Tom Heaton leh kum 30 mi Jack Butland te niin, Butland erawh hi Crystal Palace atanga an hawh a ni.
United hian goalkeeper thar an zawng niin chanchinbu mite chuan an ziak a, FC Porto keeper Diogo Costa, Bayern Munich goalkeeper Yann Sommer leh Anderlecht goalkeeper Bart Verbruggen te chu United nen hian chanchinbu mite chuan an sawizawm.
De Gea hi contract thar an ziahpui a nih chuan United hian goalkeeper thar la lovin, an goalkeeper loan-a chhuak mek Matej Kovar chu De Gea elpui tur hian first team lamah dah an tum nia sawi a ni a, tunah hian Kovar hi Czech club Sparta Prague-ah a khel mek a, tun season zawh rualin Old Trafford-ah a kir dawn.
Czech keeper Kovar hian Sparta Prague-ah hian season a hmang tha hle a, Czech First League table-ah Sparta Prague hi pakhatnaah a awmpui mek a, kum 9 hnua a vawi khat nan Sparta Prague hi an champion a rinawm hle.
Kum 2018 khan FC Slovacko atangin Kovar hian United a zawm a, United first team tan kum 22 mi hi a la inlan lo. Ole Gunner Solskjaer-a hnuaiah khan Kovar hi Champions League squad-ah a lo awm tawh a, Swindon leh Burton-ah te loan-in a khel tawh bawk a, season tharah De Gea nen number one nih an inchuh lovang tih a sawi theih loh a ni.
