Premier League season tharah Arsenal chuan champion theihna chance tha tak an neih thu Ramsey chuan goal.com a hrilh.

Ramsey chuan tun season liamtaa Arsenal player ten hmasawnna nasa tak an neih chu 2015-16 season hian an chhawr tangkai a ring hle a. "Season danga kan neih theih loh ngelnghehna chu tun season liamta khan Arsenal team-ah kan hmu chiang hle. Khelh chhiat chang nei zeuh zeuh mah ila season tluanin kan chetha hle a. Player te kan puitlin chhoh nasat em avangin kum tharah chuan dinhmun tha takah kan ding ngei dawn a ni.

"Team hi nasa takin a insawh nghet tawh a, tupawh mai hi kan inman tawh em em. Talent tha tak tak leh theihna tam tak mual chhungah kan hmu thin. Khawi position atang pawhin kan hlauhawm tawh a, defensive lamah pawh kan khawng tawh em em a, season tharah chuan title chuh thei khawpa tha kan ni dawn a ni." tiin a sawi.

Premier League-a Arsenal an champion hnuhnun ber kha 2003-04 daih tawh kha a ni a, kum 10 a liam daih tawh, Arsenal hian Premier League title lak tumin theih tawp chhuah mahse an elpuite an len thin em avang leh squad an neih pan thin avangin season chawhnu lamah an zuih ral leh thin. Tun season-ah erawh an game a hmuhnawm tluan parh kan ti thei awm e. Tuna player awm mekte hi an chhuah darh lova, player pawimawh pahnih khat an la lut a nih ngat chuan season tharah chuan team hlauhawm ber pawl an ni ngei dawn.

Tun Inrinni hian Wembley Stadium-ah FA Cup final an khel dawn. Arsenal hian Aston Villa an hneh a nih chuan a zawnin FA Cup title an la dawn ta a. Tun season liam ta tawp lamah khan nasa takin Arsenal player teah hmasawnna kan hmu a. Premier League match hnuhnung lamah a zawnin vawi 8 lai hnehna an chang a, thla hmasa khan Chelsea an draw a, an game hnuhnung 14 atangin vawi khat chiah chak loh an nei a ni.