Manchester City player David Silva chuan season thar lo awm leh tur zawh rualin Manchester City a chhuahsan tur thu a sawi.

Kum 33 mi Silva hian kum 2010 khan City hi Valencia atangin a zawm a, 2019/20 season chu Etihad Stadium-a a season hnuhnung ber a ni dawnin a lang. City-ah kum sawm dawn cham tawhin Silva hian game 395 a khel tawh.

Silva hian kumin March thla kha City-ah kum khat daih contract a ziak thar a, a contract hi season leh pek zawh rualin a tawp ve dawn. A contract hi a hmang zo a nih chuan Silva hi City-ah kum sawm a awm chiah dawn a, a tan kum sawm chu a tawk thu a sawi.

Silva chuan, “Contract ka ziah belh tawh dawn lova, tun hi a tawpna tur a ni. Ka tan chuan kum sawm hi a tawk viaua, a hun pawh a dik thlap dawn. March thlaa kum khat daih contract ka ziah khan, a tirah City khan kum hnih ziahpui min duh. Mahse kum khat dang ziah ka duh a kum sawm a ni chiah dawn a ni,” a ti.

City-a kum kaw a cham chhungin Silva hi City player pawimawh ber zinga mi leh an player tha ber zinga mi a chho a, City tan Premier League title pali, FA Cup pahnih, League Cup pali-te chawi tawhin season liamta khan league game 33 khelin, City chu Premier League-ah a champion pui a ni.