Lewis Hamilton chuan 2018 a hmang tha hle a, world champion niin Pathianni khan Abu Dhabi-ah pakhatna a la ni zui bawk a. World title a lak hnuah season thar atan a rilru a kaltir leh tan nghal niin a sawi.

British driver Lewis Hamilton chu Formula One season kharna Abu Dhabi Grand Prix-ah a chak ber a, Formula One title a kawl lai chu a humhim chiang hle a. Tun season chhungin vawi 11 chu a chak ber a ni thei a, world championship title hi vawi 5 a la ta a, 1950 vel bawra Argentine driver Juan Manuel Fangio nen an champion zat a inang ta chiah a ni.

Ferrari driver Sebastian Vettel chu pahnihna niin, Red Bull driver Max Verstappen chu pathumna a ni a. Mercedes driver Hamilton hian 2019 a thlir tan nghal tih a sawi a ni.

Hamilton chuan, “Tun season-ah khan result tha deuh neih theih kha ka duh a, chutiang thlentir thei tur chuan theihtawp ka chhuah a. Season thara bul tan dan tur ka ngaihtuah tan leh nghal a, ruahmanna fel tak neih hi a pawimawh a ni,” a ti.

Season tharah pawh Hamilton chuan kumina a elpui deuh ber Ferrari driver Vettel chu Mercedes tan chuan huphurhawm leh ber tur a nih thu a sawi.

“Kum tharah kan tlan chho leh ang a, ka rin dan chuan Sebastian Vettel leh ka teammate Valtteri Bottas te chu a huphurhawm ber tur an nih hmel a. Red Bull hian car an nei tha hle a, kuminah pawh kum tawp lamah an hlauhawm hle a, kum tharah phei chuan engine thar an nei dawn a, an tawrhhlelhawm viau maithei a ni,” a ti.

A sawi zelnaah, “Red Bull hian Mercedes an rawn el pha ang em tih zawhna chu el phak ka ring hle mai a. A pawimawh ber mai chu kum tluanin rintlak takin awm thei se, chu aia tha leh pawimawh chu a awm lo a. Duhsakna ka hlan a, inel turin kan inpeih a ni tih ka sawi nghal duh a ni,” a ti bawk.