Season second half tlan turin Rossi inpeih
2015 MotoGP season chawhma tlan zawh a ni tawh a, an chawl ren rawn hnuah season second half tlan turin an inbuatsaih leh mek.
Intlansiak 18-ah a chanve tlan zawh tawh a ni a, Yamaha rider Valentino Rossi chuan season chawhmaah pakhatna vawi thum a ni bakah podium vawi 6 lai a chang bawk. Championship-ah hma a hruai mek a, amah hnai bertu Yamaha-a a thianpa Jorge Lorenzo lakah point 13-in hma a hruai mek. Intlansiak vawi 9 an la nei leh dawn.
"Season chawhnu lam intlansiak turin ka inpeih ta et awt hle, vawi 9 intlansiak kan neih hnuah kan chawl det, he chawlh hi a tangkai hle mai, intuaithar leh nan ka hmang a ni.
"Intlansiak pakua a la awm a, Champion tur chuan an pawimawh vek a ni. Season chawhma lamah ka ti tha thawkhat hle, intlansiak 9 atangin podium vawi 9 ka chang. Season chawhnu lam pawh tluang taka ka hman ka beisei," tiin hmahruai mektu Rossi chuan a sawi.
Tun weekend hian Indianapolis-ah season second half bul an tan leh dawn. Indianapolis-ah Rossi hi a che tha ngai lo. Intlansiak vawi 7-ah vawi khat chiah pakhatna a la ni. Rossi chuan,
"Intlansiakna hmun thenkhat chu ka ngainat em emte an ni a, thenkhatah erawh chuan fing taka tlan a ngaihna hmunte a awm. Indianapolis-ah bul kan tan leh dawn a, he tlankawng hi ka ngainat loh pakhat a ni, mahse a boruak erawh a ropui hle, tlankawng pawh a tha em em bawk, tlan turin ka inpeih ta e," tiin a sawi.
source : Foxsport
image credit : motogp.com
