15 Feb 2020 12:51

bakteaJr.

Mizo tlangval

​Season hnih UCL khel thei lo turin Man City an hrem

Europe-a football thuneitu sang ber UEFA chuan Manchester City chu UEFA Club Licensing dan leh Financial Fair Play dan te nasa taka an bawhchhiat avangin na takin a hrem.

UEFA hian Premier League champion lai Manchester City hi season hnih chhung ngawt Champions League khel thei lo tura an hrem bakah euro maktaduai 30 (pound maktaduai 24.9) lai an chawi tir bawk.

UEFA chuan an thuchhuah siamah City chu UEFA-in an chhuina kawngah an intulut tawk lo niin an sawia, hemi bakah hian an sponsorship chungchangah City chuan thu dik tawk lo UEFA hnenah an hrilh ni te pawhin tarlan a ni a, City hian player lak luh an duh avangin an sum lak luh zat hi thupin thudik lo an theh lut niin UEFA thuchhuah atang hi chuan a lang.

Adjudicatory Chamber of the Club Financial Control Body (CFCB) chuan City hi thiamloh an chantira, mahse City hi thuneitu sang zawk Arbitration for Sport (CAS) hnenah an zualko ve dawna, thil a la danglam thei.

City hi hrem tlang an nih chuan kum 2020/21 leh kum 2021/22 season-ah te European competition-ah an inlan thei dawn lo tihna a ni a, hemi bakah hian sum tam thakm tak an chawi dawn bawka, Champions League season hnih chhung an khel thei lo a nih ngat chuan club pawhin a tuar ve viau tura ngaih a ni.

Manchester City lam pawhin thuchhuah siam ve nghalin, “UEFA Adjudicatory Chamber thuchhuahah hian Manchester City chu lungawi lo mahse mak kan ti lova, a chhan chu he thil hi kan beisei ruk sa reng niin, independent body awn lam nei lo hnenah kan zualko ngei dawn.

“Kum 2018 December thla khan UEFA Chief Investigator chuan chhui pawh kan ni hma hauh leh club pawh eng mah an hrilhriat hma in he hremna an lek tum hi mipui hriatah a tlangzarh tawha, chuvang chuan UEFA hian heti ang hremna hi club chungah a lek dawn tih a hriatthiam theih sa a ni. Hemi chungchangah pawh hian club chuan CAS hriatpuina in UEFA Disciplinary body hnenah complain a lo theh lut tawh.

“A awlsam dan bera sawi dawn chuan he thil hi UEFA bul tan a ni a, a hremtu leh thutlukna siam pawh UEFA a ni. Hemi chungchangah a hmawr bawk a ni tawh bawk nen club chuan a khin letna turin hma a la ve tan tawh dawna, a rang thei ang berin he thil hi chinfel tum a ni a, Arbitration for Sport hnenah a rang thei ang bera zualko tum a ni,” an ti.